హోమ్

23, జనవరి 2026, శుక్రవారం

1983: ఒక సంవత్సరం కాదు... ఒక చరిత్ర!

 కాలచక్రంలో కొన్ని సంవత్సరాలు వస్తాయి, వెళ్తాయి. కానీ కొన్ని సంవత్సరాలు మాత్రం చరిత్ర గతిని శాశ్వతంగా మార్చేస్తాయి. అచ్చం అలాంటిదే 1983.

భారతదేశం గర్వంతో తలెత్తుకున్న సంవత్సరం అది. తెలుగు వాడి ఆత్మగౌరవం ఢిల్లీ పీఠాన్ని కదిలించిన సంవత్సరం అది. సామాన్యుడి కలలకు రెక్కలొచ్చిన సంవత్సరం అది.

ఒక్కసారి వెనక్కి తిరిగి చూస్తే... ఎన్ని సంచలనాలు!



సంవత్సరం మొదట్లోనే ఒక ప్రభంజనం. "తెలుగు వారి ఆత్మగౌరవం" నినాదంతో, చైతన్య రథం పై ఎన్టీఆర్ ఊరూరా తిరిగితే, జనం నీరాజనం పట్టారు. దశాబ్దాల కాంగ్రెస్ పాలనకు చరమగీతం పాడుతూ, ఎన్టీఆర్ ముఖ్యమంత్రి పీఠాన్ని అధిరోహించారు. అది కేవలం రాజకీయ విజయం కాదు, తెలుగు జాతికి దొరికిన కొత్త గుర్తింపు.

అదే సంవత్సరం, వెండితెర మీద ఒక కొత్త చరిత్ర మొదలైంది. 'ఖైదీ' రూపంలో ఒక యువకుడు బాక్సాఫీస్ బద్దలు కొట్టాడు. ఆవేశం, యాక్షన్, స్టైల్... అన్నీ కలిపి చిరంజీవి అనే ఒక "సుప్రీం హీరో"కి పునాది పడింది అక్కడే. ఆ సినిమానే లేకపోతే ఈరోజు మనకు 'మెగాస్టార్' దొరికేవారో లేదో!

మరోవైపు, కళాత్మకతకు, కమర్షియల్ హంగులకు మధ్య ఒక అద్భుతమైన వంతెన కట్టారు కె. విశ్వనాథ్ గారు. కమల్ హాసన్ 'సాగరసంగమం' చూసి జాతీయ చలనచిత్ర పరిశ్రమ మొత్తం ముక్కున వేలేసుకుంది. తెలుగు సినిమా స్థాయిని జాతీయ స్థాయికి తీసుకెళ్లిన క్లాసిక్ అది.

ఇక జూన్ 25, 1983... లార్డ్స్ బాల్కనీలో కపిల్ దేవ్ ఆ కప్పుని చేతిలో పట్టుకున్న క్షణం. అప్పటివరకూ క్రికెట్ అంటే ఒక ఆట మాత్రమే. కానీ వెస్టిండీస్ లాంటి దిగ్గజాలను ఓడించి, టీమ్ ఇండియా వరల్డ్ కప్ గెలిచిన ఆ రోజు... క్రికెట్ ఈ దేశానికి ఒక మతమైపోయింది. ప్రతి భారతీయుడి గుండె ఉప్పొంగిన క్షణమది.

ఇవన్నీ ఒక ఎత్తైతే... సామాన్యుడి ఇంటి ముందు ఒక చిన్న కారు వచ్చి ఆగింది. అదే మారుతి 800. అప్పటివరకూ కారు అనేది కేవలం ధనికుల సొత్తు. కానీ మారుతి రాకతో మధ్యతరగతి మనిషి కూడా కారులో తిరగగలనని కలలు కనడం మొదలుపెట్టాడు. భారతీయ రోడ్ల రూపురేఖలు మారిపోయాయి.

రాజకీయాల్లో ఒక కుదుపు, క్రికెట్‌లో ఒక గెలుపు, సినిమాల్లో ఒక మలుపు, సామాన్యుడికి ఒక మెరుపు... అన్నీ 1983 లోనే!

నిజంగా... 1983 ఒక సంవత్సరం కాదు, అదొక ఎమోషన్! ఆ రోజులను చూసిన వారు అదృష్టవంతులు, వాటి గురించి చదువుతున్న మనం గర్వించదగిన వాళ్ళం.

3, జనవరి 2024, బుధవారం

గాయం

 


డెందం గాయపడుతోంది,
నువ్వు దూరమైపోతున్నందుకు.
హృదయం చిద్ర మౌతోంది,
ఆ దూరానికి కారణం నేనే అవుతున్నందుకు.
శక్తి యుక్తులు మోహరించి,
లెక్క లేనన్ని యత్నాలు,
నీ మనసు తలుపు మళ్ళీ తట్టేందుకు.
మనసు మరింత జారి పోతోంది,
నువ్వు ఇంకా దూరం జరుగుతున్నందుకు.
వీటన్నిటిని మించి, మెలిపెట్టే బాధ,
ఒక్క మొయిని మనసుకు ఉరేసి పోతోంది,
నీ ప్రతి చర్యా సబబే అనిపిస్తున్నందుకు.

29, ఆగస్టు 2023, మంగళవారం

తెలుగుభాషాదినోత్సవం

 

"జనని సంస్కృతంబు సకల భాషలకును

దేశభాషలందు తెలుగు లెస్స

జగతి తల్లి కంటె సౌభాగ్య సంపద

మెచ్చుటాడుబిడ్డ మేలు కాదె"

(శ్రీనాధకవిసార్వభౌముని క్రీడాభిరామము నుండి)

అర్థము: అన్ని భాషలకు ఆద్యము సంస్కృతము. కానీ దేశభాషలందు తెలుగు ఉన్నతమైనది. తల్లిని మించిన సౌభాగ్య సంపద కల్గిన బిడ్డ ఎంతో గొప్పది కదా.


దేశభాషలందు తెలుగు లెస్స అన్న మొదటి మహానుభావుడు మన కవిసార్వభౌముడు శ్రీనాధుడు. ఆ వాస్తవాన్ని బలపరచినవాడు సాహితీ సమరాంగణ సార్వభౌముడు శ్రీకృష్ణ దేవరాయుడు. 

ఆయన వ్రాసిన పద్యమేమిటంటే :

"తెలుగదేల యన్న దేశమ్ము తెలుగేను

తెలుగు వల్లభుండ తెలుగొకండ

ఎల్ల నృపులు గొల్వ ఎరుగనా బాసాడి

దేశభాషలందు తెలుగు లెస్స"

అయ్యా! తెలుగే ఎందుకంటే నా పాలిత ప్రాంతమే తెలుగు. నేను ఈ ఆంధ్ర భూమికి నేతను.సకల సామంత రాజులతో నేనొక్కడినే మాటలాడి తెలుసుకొన్నదేమిటంటే దేశ భాషలన్నిటిలో తెలుగు శ్రేష్టమైనది.


8, ఆగస్టు 2023, మంగళవారం

పిచ్చి కి లోకం దాసోహం!!

ఆ రోజు ఆదివారం. అప్పుడే జానెడు పొద్దెక్కింది. సుబ్బారావు నిద్ర లేచి చుట్టూ చూసాడు. 

మామూలుగా సుబ్బారావు ఆదివారం బారెడు పొద్దెక్కితే గానీ లేవడు. కానీ ఇటీవల సెల్ఫీ విషయం లో వివాదం జరిగాక, సుందరి చేసిన వికటాట్టహాసం గుర్తు వచ్చి నిద్ర సరిగా పట్టట్లేదు సుబ్బూకి.

సుందరి జాడ లేదు ఇంట్లో. ఇంత పొద్దున్నే ఎక్కడికెళ్ళిందబ్బా అనుకుంటూ ఇల్లంతా కలియ తిరిగాడు. ఎక్కడా కనపడక పోయే సరికి, ఫోన్ చేద్దామని సెల్ చూస్తే ఓ మెసేజి.

"సుబ్బూ, ఈ సెలబ్రిటీ బతుకు చాలా కష్టం. ఫ్యాన్స్ కోసం పొద్దున్నే లేచి, పార్క్ కెళ్తున్నా, ఇన్‌స్టా లో మంచి పక్షుల ఫోటో లు పెడతానని మాటిచ్చా"

ఆకలి వేసి పొట్ట తడుముకున్నాడు. మెసేజి ఇంకా వుంది.

"నాకు తెలుసు నీకు ఆక లౌతుందని ... ఏదో ఒకటి వండి ఉంచు"

ఛఛా!  దీని సెలబ్రిటీ పిచ్చ పాడు గానూ, సండే కూడా నేనే వండాలన్న మాట. పైకే అనుకున్నాడు.

కానీ ఇప్పుడు తనున్న పరిస్థితుల్లో సుందరి ని ఏమీ అనే ధైర్యం లేదు.

ఆ రోజు సోమ వారం ..

మళ్ళీ అదే సీన్. సుబ్బు లేచి చుట్టూ చూసాడు. దీని తిక్క తగలెయ్య.. వీక్ డే కూడా ఫ్యాన్సేనా ..అనుకుంటూ చుట్టూ వెతికాడు.

అంతలో కిచెన్ లో వండుతూ కనపడింది.

ఇవాళెవడో చచ్చాడన్నమాటే అనుకుంటూ సుందరి దగ్గరకు వచ్చి, పళ్ళికిలిస్తూ .."ఏంటి పొద్దున్నే కష్టపడుతున్నావ్?" అన్నాడు.

"నువ్వే చూడు" అంది సుందరి చిలిపిగా.

ఒక్కసారి అదిరిపడ్డాడు. విచిత్రమైన వంటేదో కనపడుతోంది.

"ఏమిటీ ఘోరం" అందామనుకున్నాడు కానీ తమాయించుకుని,

"సుందూ నేనంటే నీకెంత ప్రేమ, నా కోసం ఈ రోజు బ్రేక్‌ఫాస్ట్ వండుతున్నావా?" అన్నాడు లేని పోని భావాలేవో ఒలికిస్తూ. ఈ మధ్యనే ఇలా నటించడం అలవాటు చేసుకున్నాడు.

"ఇదా. మంగోలియన్ సలాడ్, నీ హెల్త్ కి మంచిదనీ" అంది సుందరి.

"కానీ నేనలాంటివి తినను కదా" అందామనుకున్నాడు కానీ 'హింస సెంటిమెంటు సమపాళ్ళలో' మాట గుర్తు వచ్చి,

"నా ఆరోగ్యం పట్ల నీకెంత కేర్" అన్నాడు.

"కేరా పాడా, నీ ఫామిలీ పేక్ - సిక్స్ పేక్ అవ్వాలని, రెడీ అయ్యి రా, ఇద్దరం కలిసి .." అంటుండగానే, సుబ్బూ రెడీ అవడానికి వెళ్ళిపోయాడు సంతోషంగా.

రెడీ అయ్యి తిరిగొచ్చి చూస్తే, సుందూ బ్రేక్‌ఫాస్ట్ నీట్ గా ఎరేంజ్ చేసి ఫోటో లు, సెల్ఫీలూ తీస్తోంది. ఇక ఇది ఇప్పట్లో తేలే యవ్వారం కాదనుకొని, ఆఫీస్ కి బయలు దేరుతుండగా సుందూ అంది.

"సుబ్బూ ఇవాళ టిఫినేం వండావ్?"

"అదేంటి నువ్వు చేసావ్ గా"

"అయ్యో పిచ్చి సుబ్బూ. ఇది తినడానికి కాదమ్మా. ఊరికే ఇన్‌స్టా లో, ఫేస్‌బుక్ లో పెట్టడానికి. సెలబ్రిటీ లు ఇలాంటివే తింటారని ఫ్యాన్స్ అనుకోవాలి."

ఇంకా ఫొటో లు తీస్తూనే అంది.

"నీకేం తెలుసు బాబూ మా సెలెబ్రిటీ ల కష్టాలు, ఇవాళ్టికి ఎదో ఒకటి వండేద్దూ"

"ఈ సోషల్‌నెట్‌వర్క్ ని కనిపెట్టిన వాడిని కత్తితో నడ్డి మీద షూట్ చేసి పారెయ్యాలి" కసిగా మనసులోనే అనుకుంటూ కిచెన్ లోకి పోయాడు.

ఇంకో రోజు ...

"ఈ మధ్యేంటి వంటింట్లో ఎక్కువగా ఉంటున్నావ్? .  నాకోసం ఏమైనా స్పెషల్స్ వండుతున్నావా?" ఆనందంగా అడిగాడు సుబ్బూ.

"నా సెలబ్రిటీ హోదాకి తగ్గట్టు రోజుకో కొత్త వంట చేసి, ఇన్‌స్టా లో నూ, ఫేస్‌బుక్ లో నూ పెడతానని ఇప్పుడే ఎఫ్ బి లైవ్ లో ఫ్యాన్స్‌కి ప్రామిస్ చేసా" అంది బిజీ గా ఏదో చేస్తూ.

"నీ సెలబ్రిటీ పిచ్చి కాదు గానీ, ఇదొక్క మంచి పని చేస్తున్నావ్.."

"సుబ్బూ. అన్నట్టు ఈ ఫోటో చూడు, ఇన్‌స్టా లో దుమ్ము లేపడానికి మొన్న సండే నాడు తీసా."

"ఏంటే ఇదీ. రెట్ట వేస్తున్న కాకి లా ఉందే?"

"ఎంత బావుందో కదా. ఫోన్ ఫుల్ ఛార్జింగు లో పెట్టు, ఇది అప్‌లోడయ్యాక వచ్చే కమెంట్స్ రిసీవ్ చేసుకోవాలంటే ఛార్జింగుండాలి కదా" అంది మురిసిపోతూ.

"ఇంతకీ ఏం వండుతున్నావ్?" అడిగాడు ఉత్సాహంగా.

"అరటి పండు తొక్కా, కొబ్బరి పీచూ, జీడిపప్పు తో బిస్కెట్స్ చేసా. పీచు పదార్దం, కార్బోహైడ్రేట్ ఇంకా ప్రోటీన్ సమ పాళ్ళలో ఉండే పౌష్టికాహారం. ఇదిగో రుచి చూడు, ఎంత బాగుందో" అదేదో హిందీ ఎడ్వర్టైజ్మెంట్ తెలుగు డబ్బింగులో అన్నట్టుగా అంది చిన్నగా సిగ్గుపడుతూ, నవ్వుతూ.

"దీని కంటే ఫోటో నే బెటరు." ఫోటో ని చూస్తూ అనుకున్నాడు మనసులో.

"ఇందాకా తెలియలేదు గానీ, నేషనల్ జాగ్రఫీ వాడు కూడా ఇంత అందం గా రెట్టవేస్తున్న కాకి ఫోటో తీసి ఉండడు. నీకు ఫోటోగ్రాఫర్ ఆఫ్ ద ఇయర్ అవార్డ్ ఇచ్చే దాకా నిరాహార దీక్ష చేద్దామనుకుంటున్నా" అన్నాడు ఆవేశం, తెలివి కలగలిపి.

"నేనంటే నీకెంత ప్రేమ సుబ్బూ. అలాగే చేద్దువుగానీ, ముందు ఇది తిని అప్పుడు చెయ్యి." అంది అమాయకత్వం నటిస్తూ.

తినక తప్పలేదు సుబ్బూ కి.

ఇలాంటి చిత్ర విచిత్రాల మధ్య ఇంకో రోజు .

సుందరికి ఈ సోషల్‌మీడియా పిచ్చ తగ్గించాలంటే డాక్టర్ సలహా అవసరం అని నిశ్చయించుకున్నాడు సుబ్బూ. 

కానీ తనకీ విషయం చెపితే ఎలా రియాక్టవుతుందో నని భయం కూడా వేసింది.

అందుకే...

"సుందూ నువ్వు సెలబ్రిటీ అయిపోయిన ఆనందంలో నాకు నిద్ర పట్టక, బుర్ర పని చెయ్యక, మతిపోయి డిప్రెషన్ లో కెళ్ళేట్టున్నాను. ఒక సారి డాక్టర్ దగ్గరికెళ్దామా?" అడిగాడు దీనంగా.

"నా వల్ల నీకెంత బాధ సుబ్బూ, ఈ వీధిలోనే మన ఫాలోయరు ఒకాయన, మాంచి పిచ్చి డాక్టరుట, ఉన్నాడు పద ఈవెనింగ్ వెళ్దాం."అంది బాధగా.

"సుబ్బూ ఈ డాక్టరుకి ఎన్ని డిగ్రీలో చూసావా." అంది సంబరంగా.

DR ఫలానా, FBBS,TWTR,WTSP,INST,TKTK,YT

బోర్డు చూసి అదిరి పడ్డాడు సుబ్బూ. ఏదో తేడా కొడుతోందే అనుకున్నాడు.

"సుందూ ప్రాబ్లెం నాకే కదా నేను వెళ్ళి మాట్లాడి రానా" డ్రామా కంటిన్యూ చేసాడు సుబ్బూ.

ఆ డాక్టరుకి సుందూ విషయాలన్నీ చెప్పి, సుందరి కి కౌన్సిలింగు ఇవ్వమని వేడుకొని, కొంత సేపటికి బయటకి వచ్చాడు, డాక్టర్ తో సహా.

"పెద్ద సమస్యేం కాదండి, కొన్ని టిప్స్ పాటిస్తే తగ్గి పోతుంది." అన్నాడు డాక్టర్ సుందరి తో.

సుబ్బూ వైపు తిరిగి మళ్ళీ అన్నాడు.

"మీ విషయం నాకు సుందరి గారు ఆల్రెడీ చెప్పారు. నేనీవిడ పోస్టులన్నీ ఫాలో అవుతుంటాను. ఈ మధ్య చేసిన కొబ్బరి పీచు బిస్కట్ కూడా మా ఆవిడకి చేసి పెట్టాను. ఎంత బావుందో" 

పరవశించి పోయింది సుందరి.

"దీన్ని సోషలోఫోబియా అంటారు. " అన్నాడు డాక్టర్ కంటిన్యూ చేస్తూ.

"అంటే?"

"అంటే, ఈ వ్యాధి ఉన్నవాళ్ళు సోషల్ నెట్‌వర్క్ సైట్స్ చూస్తే చిరాకు పడిపోతారు. ఎప్పుడూ మనుషులతో డైరెక్టుగా మాట్లాడాలనుకుంటారు. వాట్సాప్, ఎఫ్ బి,ట్విట్టర్, ఇన్‌స్టా లాంటివి మాత్రమే వాడాలనే స్పృహ ఉండదు. ఇలాంటి వాళ్ళు నేటి సమాజానికి ఎంత ప్రమాదకరమో నా యూట్యూబ్ చానెల్ లో వివరం గా చెప్పాను. చూడండి."

"ఈయనేంటి నన్ను పేషంటనుకుంటున్నాడు" సుబ్బూ కి అంతా అయోమయం గా ఉంది.

సుబ్బూ కన్‌ఫ్యూజన్ గమనించి "రోజూ పొద్దున్న లేస్తూనే ఒక గంట ,రాత్రి పడుకునేముందు ఒక గంట ఫేస్‌బుక్, ట్విట్టర్ , వాట్సాప్, ఇన్‌స్టాగ్రాం లు చూడండి. అలాగే రోజు కి మూడు సార్లు,  అర డజను సెల్ఫీ లు చొప్పున తీసుకోవాలి..కనీసం వంద వాట్సాప్ గ్రూపుల్లో చేరి, రోజూ గుడ్‌మార్నింగ్, గుడ్‌నైట్ మెసేజీ లు పెట్టాలి. కొన్నాళ్ళకి ఈ ఫోబియా తగ్గి పోతుంది. నన్నూ, సుందరి గారినీ ట్యాగ్ చెయ్యడం మరచిపోకండి. అలానే నా ఛానెల్ ని సబ్‌స్క్రైబ్ చేసుకొని, గంట కూడా కొట్టండి" ఒక ఫ్లో లో చెప్పుకు పోతున్నాడు.

"జబ్బు నాకు కాదు డాక్టర్ సుందరి కి అని చెప్పాను కదా." అన్నాడు సుబ్బూ జంకుతూ.

"ఆవిడకేమీ లేదండీ, ఇప్పుడందరూ ఇలానే ఉన్నారు. మీరే తేడా గా బిహేవ్ చేస్తున్నారు. అందుకని మీకే ఈ ట్రీట్‌మెంటు."

వీడు నీ ఫాలోయరు అని చెప్పినప్పుడే అర్ధం చేసుకో వాల్సింది. వీడూ సోషల్‌మీడియా పిచ్చోడేనా.

హతవిధీ!!

ఇప్పుడు నేనెక్కడికి పోవాలిరా మస్కూ, మార్కూ ..!! 


20, మార్చి 2022, ఆదివారం

భళారే స్వీయ చిత్రమా!

 జరిగిన విచిత్రాన్ని సుందరి కి చెబితే, థ్రిల్లు ఫీలవుతుందని మురిసి పోతూ ఇల్లు చేరాడు సుబ్బారావ్. ఇల్లంతా నిశ్శబ్దంగా ఉంది. ఎప్పుడూ మోగుతూ ఉండే కామెడీ చానల్ కూడా మూగ బోయింది. బుజ్జిగాడు ఆడుకోవడానికి బయటికెళ్ళినట్లున్నాడు.

సుందరి తన కళ్ళకి అరుంధతి లో అఘోరా లా కనపడుతోంది. అంతేకాదు "ఒదల సుబ్బారావ్ నిన్నొదల" అంటునట్లు ఇల్లంతా ఎకో వినబడుతోంది. ఈ మధ్య సుందరి కోపంగా వున్నప్పుడల్లా, అఘోరా మాటలు ఎకో లో వినబడడం అలవాటైపోయింది సుబ్బూ కి.
ఉపద్రవం ముంచుకు రాక ముందే సుందరి ని కూల్ చెయ్యాలనుకుంటూ, సుందూ ఇవాళేమైందో తెలిస్తే, భలే నవ్వు కుంటావ్ అని మొదలెట్టేశాడు, ఆమె వైపు కూడా చూడకుండానే.
ఆఫీసు నుండి కింద మన కార్ పార్క్ దాకా వచ్చానా, వెంఠనే ఒక ఇంపార్టెంటు ఈమెయిల్- బాసు నుంచి. ఆ మెయిలు చదువుతూ, మన ఫ్లోరుకొచ్చి,
హ్హి హ్హి హ్హి అని లేని నవ్వు తెచ్చుకుంటూ, మన ఇల్లనుకుని పక్కింటికెళ్ళిపోయా. అలవాటు ప్రకారం, సోఫా లో కూలబడి 'ఏమోయ్ టీ 'అనగానే, ఆవిడా పాపం, ఫేస్బుక్ చూసుకుంటూ టీ తెచ్చి ఇచ్చేసింది. మెయిలు కి రిప్లై ఇస్తూ, ఒక్క సిప్పు తాగానో లేదో, ఛీ యాక్ థూ అనిపించి కప్పు లోకి తొంగి చూసా. వాళ్ళాయన గ్రీన్ టీ తాగుతాడనుకుంటా. అప్పుడు తెలిసింది అది మనిల్లు కాదని. హ్హహ్హా హ్హా. భలేఉంది కదూ. ఆవిడా అంతే పాపం నవ్వుకుంటూ ఫేస్బుక్ చూస్తూ ఉండిపోయింది.
భలే తమాషా గా ఉంది కదూ? అంటూ సుందరి వైపు చూసాడు. ఇప్పుడు తను అఘోరా ని చంపబోతున్న అరుంధతి లా కనిపించింది.
ఇది కూడానా అంది, తన ఫోన్ చూపిస్తూ.
అదిరిపడ్డాడు సుబ్బు. ఆ పక్కింటావిడ తను కప్పు లోకి తొంగి చూస్తున్నప్పుడు, ఒక సెల్ఫీ తీసి, "టీ టైం విత్ మై మోస్ట్ లవ్డ్ ఒన్" అని ఫేస్బుక్ లో పోస్ట్ చేసేసింది.
"ఎంత సెల్ఫీ అయితే మాత్రం, పక్కన ఎవరున్నారో చూసుకోనక్కర్లా? ఫేస్బుక్, సెల్ఫీ ఉంటే ఇంకేమీ పట్టదా? ఏం మనిషో? ఇప్పుడు నాకేమైనా జరిగితే ఎవరిది రెస్పా్న్సిబిలిటీ?" పైకే అనేసుకున్నాడు సుబ్బు.
పోస్ట్ చేసి పట్టుమని పది నిమిషాలు కూడా కాలేదు, ఇంకేమీ పని లేనట్లు జనమంతా విపరీతమైన కామెంట్లూ, లైకులూ ను.
కామేశం గాడి భార్య చీనాంబరి "లోల్" అనీ, సుబ్బు అక్క "నైస్ పిక్, చూడ ముచ్చటైన జంట" అని కామెంటి, సుందరినీ, సుబ్బూనీ ట్యాగ్ కూడా చేసింది. కొందరు ఫ్రెండ్సు "కంగ్రాచులేషన్స్" అని కూడా పెట్టేశారు.
"ఫ్రెండ్సు కి మన గురించి పూర్తిగా తెలియదనుకుందాం, మీ అక్క కేమైంది, చూడ ముచ్చటైన జంట అని పెట్టింది. ఆవిడగారికి నేనంటే ఎందుకింత పగ." అంది సుందరి నిష్ఠూరంగా.
"సుందూ మా అక్క కి తొందరెక్కువ అని నీకు తెలుసు గా, ఏదో పొరపాటున పెట్టుంటుంది" అన్నాడు సర్దిచెబుతూ.
"ఏదో మెయిలు కి రిప్లై ఇస్తూ .. అలా జరిగి పోయింది. ఇప్పుడే పక్కింటావిడ ని ఈ పోస్టు తీసెయ్యమని చెబుతా" అన్నాడు మళ్ళీ తనే.
"ఆ ముచ్చటా తీరింది, తన కెప్పుడూ ఇన్ని లైకులూ , కామెంట్లూ రాలేదుట, అందుకని తియ్యనని చెప్పేసింది" అంది సుందరి ఇంకా కోపంగా.
"సారీ సుందూ ఇంకెప్పుడూ ఫోన్ చూస్తూ ఇంటికి రాను సరేనా" అన్నాడు సుబ్బు.
"అంతే నీకు, మీ వాళ్ళకీ తప్పులు చెయ్యడం సారీ లు చెప్పడం అలవాటేగా. మొన్నటికి మొన్న, మీ బాబాయి చేసిన నిర్వాకం చాలదనట్టు మళ్ళీ ఇదొహటి" అంది సుందరి.
"సుందూ పాపం పెద్దవాడు, ఫేస్బుక్ అలవాటులేక .." అనబోతుండగానే
"అలవాటులేకా? మా మూడో మేనత్త మొదటి ఆడపడచు పాపం భర్త పోయి పుట్టెడు దుఃఖం లో ఉంటే, ఈయన గారు 'హలో పమ్మీ, హౌ ఈజ్ యువర్ హబ్బీ, హోప్ యు ఆర్ హేవింగ్ నైస్ టైం' అని పబ్లిక్ మెసేజీ పెట్టలేదూ? ఆవిడ నాకు ఫోన్ చేసి తిట్టిన తిట్లు నాకింకా చెవుల్లో మోగుతున్నాయ్." స్వరం పెంచింది సుందరి.
"సుందూ నీకెన్ని సార్లు చెప్పాలి. పాపం, ఆయన ఆ పమ్మీ గారి కొత్త గా పెళ్ళైన మనవరాలు అనుకొని ఆ మెసేజి పెట్టేడని. ఇద్దరి పేర్లూ ఒకటే కావడం తో ఏదో కన్ఫ్యూజ్ అయ్యాడు. తర్వాత సారీ మెసేజి కూడా పబ్లిగ్గానే పెట్టేడు కూడాను. అయినా మీ వాళ్ళేమన్నా తక్కువ తిన్నారా? చావు బతుకుల మధ్య ఐసీయూ లో ఉన్న మా పెద మావయ్య ని చూడడానికొచ్చి, మీ బాబాయి 'గుడ్బై మై ఫ్రెండ్' అని ఫోటో తో సహా పెడితే, పాపం ఆయన పోయేడనుకుని అందరు ఒకటే పరామర్శలుట. మా అత్త ఎంత బాధ పడిందనీ" కౌంటరిచ్చాడు సుబ్బు.
"సుబ్బూ అది ఆయన ఆర్నెల్లు అమెరికా లో ఉండడానికెళ్తూ బై చెప్పడానికి పెట్టిన పోస్టని నీకెన్ని సార్లు చెప్పాలి? అయినా, ఆ తర్వాత, ఈ పోస్టు వల్లనే దిష్టంతా పోయి , మా ఆయన క్షేమంగా తిరిగొచ్చాడంటూ , మా బాబాయి వాళ్ళింటికొచ్చి మరీ బట్టలు పెట్టి వెళ్ళారు కదూ మీ వాళ్ళు, ఆ మాట మరిచి పోయావా?"రిటార్డిచ్చింది సుందరి.
"మీ మావయ్య చేసిన ఘనకార్యం అప్పుడే మరచి పోయావా? మా చిన్నమ్మ మనవరాళ్ళతో తీసుకున్న ఫోటో పెడితే, ఆయన గారు, 'లుకింగ్ హాట్, కీప్ ఇట్ కూల్ అని కామెంటు పెట్టలేదూ?"ఛాన్సు వదలదలుచుకోలేదు సుబ్బూ.
"అదేదో ఎండాకాలం లో మిట్టమధ్యాన్నం ఎండ లో తీసిన ఫోటో లా ఉందని, పిల్లలకి కి జాగ్రత్త చెప్పాలనే సదుద్దేశ్యం తో, హాటు కి వేరే దిక్కుమాలిన మీనింగు ఉందని తెలియక ఇంగ్లీషు లో చెప్పాడే గానీ, ఆయన ఎంత మంచివాడో నీకు మాత్రం తెలియదూ?" అంది అంతే పంతం గా.
"ఎక్కడో బాబాయిలూ, మావయ్యలూ దాక వెళ్ళేను, అసలు మీ అమ్మ, నిన్ననే తన నూట డెబ్భయ్యో ప్రొఫైల్ క్రియేట్ చేసి, ఫ్రెండు రిక్వెస్ట్ పెట్టింది. రోజూ పాస్వర్డ్ మరచి పోవడం, కొత్త ప్రొఫైల్ పెట్టడం. అదీ చాలదన్నట్లు ఈ వాట్సాప్ ఒకటి. బాదాం గింజలు తింటే మందబుద్ధి పోతుంది, కరివేపాకు తింటే మలబద్ధకం పోతుంది అంటూ దిక్కుమాలిన చిట్కాలు పంపడం, అడ్డమైన ఫార్వర్డ్ లు చెయ్యటం. నాకొక్క దానికే పంపుతోందట, కనుక్కున్నాను కూడా. కొంచం కూడా మేనర్స్ లేవు మీ వాళ్ళకి" కసురుకుంది సుందరి.
"అబ్బో మీ వంశం మేనర్స్ కి పెట్టింది పేరు మరి. ఎంత మీ నాన్న బాలయ్య అభిమాని అయితే మాత్రం, నా మనసింకా యంగే నాతో ఫ్రెండ్షిప్ చేస్తావా అని నా ఫ్రెండ్ భార్య కి రిక్వెస్ట్ పంపించాడు, పైగా బాలయ్య ప్రొఫైల్ పిక్ ఒకటి. ఈ వయసులో అవసరమా ఆయనకి ఈ కొత్త స్నేహాలు?”
"సుబ్బూ మా నాన్నని ఏమైనా అంటే ఊరుకోను"
"నువ్వు మాత్రం మా అమ్మ ని అనొచ్చా?"
"నీ ఫేస్బుక్ పేజ్ కరప్టైపోనూ"
"నీ వాట్సాప్ క్రాషైపోనూ"
"నిన్నసలూ"
“నిన్నసలూ"
ఇద్దరూ ఇలా యూ హౌ మచ్, అంటే యూ హౌ మచ్ అని ఈ-శాపాలు ఇచ్చుకుంటూండగా..బయటకెళ్ళిన బుజ్జిగాడు హడావుడిగా వచ్చాడు.
పక్కింటి ఆంటీ నాన్న తో పెట్టిన పోస్టు అపార్ట్మెంటంతా వైరల్ అయ్యిందట గా, అన్నాడు వగరుస్తూ.
కంగ్రాట్సు నాన్నా అనబోతుండగా,
పరిగెత్తుకుంటూ పక్కింటికెళ్ళి చూస్తే, అక్కడ ..
బుజ్జిగాడన్నట్లు గానే జనం గుమి గూడి ఉన్నారు. కానీ పెద్దగా అరుపులూ గట్రా లేవు. అపార్ట్మెంట్స్ లో అందరికీ టాక్ ఆఫ్ ద టౌన్ అవ్వడం ఇష్టం లేదు సుందరి సుబ్బారావులకి. ఉన్నవాళ్లంతా చెవిలో ఇయర్ ఫోన్స్ పెట్టుకుని తమ తమ ఫోన్ల లోకి తొంగి చూస్తున్నారే తప్ప పెద్దగా హడావుడి కూడా లేదు.
బహుశా ఇన్స్టాగ్రాం లో లైవ్ చూస్తున్నారనుకుంటా అన్నాడు బుజ్జి గాడు. జరిగినది చాలదన్నట్లు, మళ్ళీ ఇదొకటా, అని నిలబడ్డ చోటే కూలబడ్డాడు సుబ్బూ.
అప్పటి దాకా నయానా భయానా చెప్పి చూసిన ఆంజినేయులు ఇప్పుడు తన భార్య మంగ తాయారుని బ్రతిమిలాడే స్టేజ్ కొచ్చాడు.
"తాయారు, ప్లీజ్, ఆ ఫోటో తీసెయ్యి. పక్కింటాయన్ని "మోస్ట్ లవ్డ్ ఒన్" అని నువ్వు అనడం వినడానికి, చూడడానికి, కనీసం తలచుకోడానికి కూడా బాలేదు."
"అంజీ, నాకు మాత్రం బాధ గా లేదనుకున్నావా? కాని నేనేమీ చెయ్యలేను. ఇప్పటికే ఎన్ని లైకులూ, కామెంట్లూ వచ్చాయో చూసావుగా. ఇప్పుడు తీసేస్తే , ఆ లైకులూ, కామెంట్లూ చేసిన వాళ్ళ మనోభావాలు దెబ్బ తింటాయ్. నీ స్వార్ధం కోసం అంతమంది మనోభావాల్ని బలి తీసుకుంటావా?"
"ఈ మనోభావాలను కనిపెట్టిన వాడికి అరవ డబ్బింగు సీరియల్ ఆరు వేల ఎపిసోడ్లూ ఆపకుండా చూపించాలి." కసిగా తిట్టుకున్నాడు అంజి
"పోనీ కనీసం ఆ "మోస్ట్ లవ్డ్ ఒన్" ని "మోస్ట్ లవ్డ్ అన్న" అనైనా మార్చు" పట్టు వదల్లేదు అంజి.
"అంజీ, నాకు మాత్రం బాధ గా లేదనుకున్నావా? కాని నేనేమీ చెయ్యలేను..." తాయారు అదే డైలాగు రిపీట్ చేస్తూండగా.
"మేగీ (మంగ తాయారుని ఐస్ చెయ్యడానికి అప్పుడప్పుడూ ఇలానే పిలుస్తాడు అంజి) సీరియల్ లాగ రిపీట్ చెయ్యకు. ఎంత సెల్ఫీ అయితే మాత్రం పక్కన ఎవరున్నారో చూసుకోవద్దా?" గద్దించాడు అంజి.
"అసలు మన పెళ్ళి కాక ముందు మా పల్లెటూళ్ళో ఈ టెక్నాలజీ గొడవ లేకుండా హాయిగా ఉండేదాన్ని, ఎంగేజ్మెంట్ అవ్వగానే, నువ్వు కాదూ నాకు సెల్ఫీ కెమేరా ఉన్న ఫోన్ ఇచ్చింది? రోజూ నిన్ను చూడాలనిపిస్తోంది, రోజుకో
సెల్ఫీ పంపించమని, నువ్వు కాదూ నాకు ఈ దిక్కుమాలిన సెల్ఫీ జబ్బు అంటగట్టింది. ఇప్పుడు గంటకో సెల్ఫీ, అరగంటకో వాట్సాప్ స్టేటస్ , పూటకో ఫేస్బుక్ అప్డేట్ లేకుండా ఉండలేకపోతున్నాను. మన పెళ్ళి ఫోటో లకి కూడా ఇంత పాపులారిటీ రాలేదు. ఇప్పుడిప్పుడే మొగ్గ తొడిగి, పూవై, కాయై, మహా వృక్షం గా ఎదగ బోతున్న నా ప్రొఫైల్ ని మొదట్లోనే తుంచేస్తావా?" బాధగా మూలిగింది మేగీ.
"మేగీ ప్లీజ్ నీ మెగా సీరియల్ ఆపేయ్" కాళ్ళు పట్టుకోవడమే తరువాయి అన్నట్లున్నాడు అంజి.
"ఎందుకు ఆపాలి? చేసిందంతా నువ్వుచేసి, ఈ పోస్ట్ విషయం లో నన్ను ఫోర్స్ చేయడం నువ్వే ఆపెయ్. " తగ్గేదేలే అనే టైపులో అంది మేగీ.
ఇదింక తేలేలా లేదని అర్ధమౌతోంది సుందరి, సుబ్బూలకి.
"సుందూ ఇప్పుడు ఏమిటి నా పొజిషన్" జాలిగా అడిగాడు సుబ్బూ.
ఏముంది, ఇక ముందు నీ జీవితం హింస, సెంటిమెంటు సమ పాళ్ళలో కలబోసిన థ్రిల్లర్ లా ఉండబోతోంది. కఠినం గా అంది సుందూ.
చచ్చాం, ఇప్పటికే ఎన్నో చిత్ర విచిత్రాలు చూపించిన సుందరి ఇక ముందు నరకం చూపించబోతోందా? మనసులో అనాలనుకుని, పైకే భయపడుతూ అనేశాడు సుబ్బూ.
కరెక్ట్ అంటూ వికటాట్టహాసం చేసింది సుందరి.
పాపం సుబ్బూ.

30, జూన్ 2020, మంగళవారం

ఆనాటి కథలు మన డిడి లో


ఆ మధ్య డిడి వాళ్ళు రామాయణం, మహభారతం పునః ప్రసారం చేస్తే ఎంతో సంబరంగా చూసారు చాలా మంది.
అప్పుడు మన తెలుగు డిడి వాళ్లు కూడా అప్పటి కథలు గట్రా వెయ్యొచ్చు కదా అనుకున్నా. 
ఈమధ్య యూట్యూబ్ లో కాశీ మజిలీ కథలు వింటుంటే (అజగవ ఛానెల్), డిడి యాదగిరి వాళ్ళు పెట్టిన పాత కథలు కనపడ్డాయి. 
కందుకూరి వారి రాజశేఖర చరిత్రము, విశ్వనాథ వారి వేయి పడగలు, ముని మాణిక్యం వారి కాంతం కథలు, కాటమరాజు కథలు, ధర్మవరపు గారి ఆనందోబ్రహ్మ, భరాగో వారి కథలు, మల్లాది రామకృష్ణ శాస్త్రి గారి కథలూ,మర్యాద రామన్న  అన్నీ కనిపించాయి.
ఈ తరం వారికి చాలా స్లో గా అనిపించినా, అప్పట్లో ఇవన్నీ చూసి ఆనందించిన వారికి బాగుంటాయని నా నమ్మకం. 
నా మటుకు నాకు చిన్నప్పుడు ఆదివారం నాడు ఆనందోబ్రహ్మ చూసి బాగా నవ్వుకున్న విషయాలన్నీ గుర్తుకొచ్చాయి.

మీలో ఎవరికైనా ఇంట్రస్టు ఉంటే చూడండి మరి.  కొన్ని లంకెలు క్రింద ఇచ్చాను ..చూసి ఆనందించండి













21, జూన్ 2019, శుక్రవారం

నీకంటూ ఒక రోజు

నీకంటూ ఒక రోజొస్తుంది
ఈ లోకం జేజేలంటుంది

మనసంటూ నీకొకటుంటుంది
అది ఏదో చేద్దామంటుంది
నీ కలలకు నువ్వే రారాజు
నీ ప్రతిభకు ఎవరూ సరిపోరు.

పడి లేచే కెరటం నువ్వైతే
ఆకాశం నీదే అవుతుంది.
శ్రమ చేసే నేర్పే నీకుంటే
ఫలితానికి  హద్దే ముంటుంది.

నీ కష్టమే నీకు చిరునామా
నీ ధైర్యం నీకొక సాధనమా
నీ లక్ష్యం ఏదని కనిపెట్టు
నీ అడుగే దానికి తొలిమెట్టు

జీవితమంటే పరుగేనా?
ప్రతి రోజూ ఏదో దిగులేనా?
లోకం ఏదో అంటోందా?
నువు పనికే రావని నవ్విందా?

కాలం జవాబు చెబుతుంది
నీకంటూ ఒక రోజొస్తుంది

నీ ప్రశ్న కి నువ్వే తొలి బదులు
చిరునవ్వే చెదరక నువు కదులు
నీ బ్రతుకు కి ఉంది ఒక అర్థం
అది తెలియక పోతే  నువు వ్యర్ధం

ఎప్పుడు ఎలాగ పోతావో
నీకైనా తెలిసే వీలుందా?
ఎవరెప్పుడు ఏం సాధిస్తారో
కనిపెట్టే సాధనముంటుందా?

వట్టి చేతులతో వచ్చావు
వట్టి చేతులతో పోతావు
పోయినవన్నీ నీవేనా?
మిగిలున్నవి నీతో వస్తాయా?

నీ కీర్తే నీతో వచ్చేది
నీకంటూ ఒక రోజొస్తుంది
ఈ లోకం జేజేలంటుంది

30, మే 2019, గురువారం

తేయాకు పంతులు

వంశ పారంపర్యంగా వస్తున్న పౌరోహిత్యాన్ని కాదని, ఏదైనా వ్యాపారం చేస్తానని ఒక కొడుకు , అగ్రహారానికే పెద్ద అయిన తన తండ్రితో అనడం ఆ రోజుల్లో విడ్డూరమే. ఇప్పటి మాట కాదు, అప్పుడప్పుడే జన బాహుళ్యంలో కి టీ చొచ్చుకొస్తున్న రోజులు.

అలా రాజమహేంద్రవరం విడిచి, బెజవాడ చేరుకున్న ఆ పంతులు అసలు పేరు జనం మరచి పోయేరు. తేయాకు పంతులు అని మాత్రమే అందరికీ తెలుసు.

తేయాకు పంతులు, మొదట్లో ఒక బండి మీద వీధి వీధీ తిరిగి జనాలకి టీ తయారు చేసి పోస్తుండేవాడు. తన కులాన్ని దాచకుండానే అన్ని చోట్లా కలియ తిరిగి, అందరికీ తన టీ రుచి చూపించే వాడు. చెవులు కొరుక్కున్న వారు కొరుక్కున్నారు. మా వీధికి రావద్దన్న వారూ ఉన్నారు. అవన్నీ పట్టించుకోకుండా తన పని తాను చూసుకునేవాడు. టీ రుచి చూసి బాగుందన్న వారికి టీ పొడి అమ్మడమే కాక,ఎలా తయారుచేసుకోవాలో వివరించేవాడు. క్రమేణా పరగణా అంతా అందరికీ పరిచయమై పోయాడు.

దుకాణదారులకి కూడా టీ గురించిన విశేషాలు తెలుపుతూ, టోకు న వారికీ అమ్మేవాడు. టీ పొడి తో కొత్త ప్రయోగాలు చేసేవాడు. అవి అందరికీ రుచి చూపించేవాడు కూడా. రక రకాల మూలికలు పొడి చేసి, టీ పొడిలో లో కలుపుతూ వాటి నుంచి ఆరోగ్య సంబంధిత ప్రయోజనాలు రాబట్టేవాడు. నిజంగా ఆ మూలికా టీ పొడులు రోగాలను తగ్గించినా, తగ్గించక పోయినా జనాలు ఆ రుచి కి మైమరచి పోయి, అతని టీ పొడి కొనుక్కునేవారు.

ఇదంతా ఒక ఎత్తైతే, తండ్రి చే వెలివేయబడడం వల్ల, అతనికి అయిన సంబంధాలు రాలేదు. అతడే ఒక పిల్లను చూసుకుని పెండ్లాడాడు. అతడి ప్రయోజకత్వం చూసి పిల్లతరపు వాళ్ళు కూడా మురిసి పోయారు. తనకి తెలిసిన వాళ్ళందరికీ కులాంతర వివాహాలు చేసుకోవాలని చెబుతుండేవాడు.

కొందరికి రోగాలు నయం చేసే టీ వైద్యుడు గానూ, మరికొందరికి కుల వ్యవస్థ పై పోరాడే సంస్కర్త గాను, కొందరికి కిటుకు తెలిసిన వ్యాపారస్థుడు గానూ అగుపించేవాడు. అతని వ్యవహారం నచ్చని చాలా మంది అతడిని ద్వేషించేవారు కూడా.

ఇవన్నీ పట్టేవి కాదు అతనికి. టీ లు చేసీ చేసీ , జనాలకి తాగించీ తాగించీ, అతడు కొంత కాలానికి కేవలం టీ ల తో నే రోజులు వెళ్ళబుచ్చేవాడు. మరే ఇతర ఆహారం రుచించేది కాదు. ఎవరైనా "ఆరోగ్యం పాడైపోదుటయ్యా ఇలా టీలు తాగితే?" అంటే నవ్వి ఊరుకునేవాడు.

ఆ నవ్వు ఆంతర్యం ఎవరికీ తెలిసేది కాదు.

అతని వ్యాపారం లానే కుటుంబం కూడా పెరిగింది. ధనవంతుడైనాడు. చేతికింద పని వాళ్ళు టీ పొడి ని, రక రకాల మూలికలని సేకరించడం వంటి పనులు చేసేవారు. కాని అతని ఇంద్రజాలమంతా వాటన్నిటినీ మిశ్రమించే పాళ్ళలోనే ఉండేది. అది అతడు ఎవ్వరికీ చెప్పలేదు, చివరికి కట్టుకున్న భార్య కి కూడా. వ్యాపారం ఎంత విస్తరించినా, మొదటి నుంచీ తనకు వెన్ను దన్ను గా వున్న దుకాణదారులని తనే స్వయంగా కలిసేవాడు. వాళ్ళతో కలిసి టీ సేవించేవాడు. "పంతులూ, నీ చేతి టీ లో ఏదో మాయ ఉందయ్యా" అనేవాళ్ళు.

అతనేమైనా నల్ల మందు వంటివి కలుపుతాడేమో నని రకరకాలుగా పరీక్షించిన వారూ ఉన్నారు. పుకారులూ పుట్టించారు, అవేమీ అతని వ్యాపారాన్ని తగ్గించలేదు.

ఇలా చాల యేళ్ళు గడిచాయి. ఎనభై యేళ్ళొచ్చినా, తన బండి పై తిరిగి తన వ్యాపారం తనే చూసుకునేవాడు. ఒక దశలో అతడిని పిచ్చి వాడనుకున్నారు అనేకులు.

తన పిల్లలకు గాని, వాళ్ళ పిల్లలకు గాని తన వ్యాపారం అప్పగించలేదు. వాళ్ళూ ఎప్పుడూ అడగలేదు. అతడి వయసుకి ఏమాత్రం సంబంధం లేని అతడి ఉత్సాహం చూస్తే మరణం అతడి వద్దకు వచ్చే సాహసం చేస్తుందా అనుకునేవారు.

తాతా నీ అరోగ్య రహస్యం ఏమిటీ? అంటే, టీ ని చూపించేవాడు.

ఎవరికి అంతు చిక్కేది కాదు అతడి వ్యవహారం. ఎవరు టీ చేసినా తాగేవాడు కాదు తన టీ తనే తయారు చేసుకునేవాడు. ఆఖరికి తన కట్ట కడపటి మనవరాలు ఎంతో అద్భుతం గా టీ చేస్తుందని తెలిసినా ఎప్పుడూ రుచి చూసిన పాపాన పోలేదు. ఇంత అహంకారం పనికి రాదనేది భార్య. అతడు ఆ మాటని కొట్టి పారేసేవాడు.

నీడలా వెన్నంటే వున్న భార్య కాల ధర్మం చేసాక, కొంచం క్రుంగి పోయాడు.ఇన్నాళ్ళుగా అతని ఆరోగ్య రహస్యం టీ అనుకున్న అతడే, ఇప్పుడు ఆ రహస్యం తన భార్య తనకి అందించిన  శాంతి, స్వాంతనే అని గ్రహించాడు.

ఉత్సాహం తో పాటూ ఆరోగ్యం నెమ్మదిగా క్షీణించింది. డాక్టరైన తన మనవడు, తాత కి ఖరాఖండీ గా చెప్పేసాడు. ఇక టీ తాగ రాదనీ, దాని వల్లనే అతడి ఆరోగ్యం చెడిపోయిందనీను.
ఒప్పుకోలేదు తేయాకు పంతులు. తన పేరులోనే టీ ఉందనీ, దానిని దూరం చేయవద్దనీ వేడుకున్నాడు. పడింది కాదు.


ఎవరు ఎంత వారించినా, తిరుగుతూనే ఉండేవాడు. పని లో పడితే అనారోగ్యం తనని ఏమీ చేయదనే వాడు. మొండి ఘటం.
ఒక రోజు ఇక తన తేయాకు రహస్యాన్ని మరొకరికి బదిలీ చేయాల్సిన అవసరం వచ్చిందని గ్రహించాడు. తన కుటుంబాన్నంతటినీ రమ్మని కబురంపాడు. ఎక్కెడెక్కడి వాళ్ళూ వచ్చి చేరారు.
వాళ్ళకి తన కథ అంతా వినిపించాడు. తన ప్రతిపాదన వారి ముందు పెట్టాడు.
తన ఆస్థి నంతా పంచుతాననీ, కానీ తేయాకు రహస్యం కావాలనుకున్న వారు తన వ్యాపారాన్నీ, ఆ రహస్యాన్నీ మాత్రమే తీసుకోవాలనీ, ఆస్థి ఆశించ రాదని చెప్పాడు. వ్యాపారం తీసుకోవడానికి ఒక్కరూ ముందుకు రాలేదు. ఏ టీ వల్ల తానింతటి వాడై, ఇంత మంది జీవితాల్ని నిలబెట్టాడో ఆ టీ ఇప్పుడు ఎవరికీ వద్దన్నారు.
తనకెంతో ఇష్టుడైన ఒక మనవడినగాడు. ఆ మనవడన్నాడూ, "తాతా నీ వ్యాపారం తీసుకుంటే కష్ట పడాల్సి వస్తుంది. ఇప్పుడు నీ టీ కొనేవారంతా నిన్ను చూసే కొంటున్నారు. నీ వారసుడికి నీ అంత లౌక్యం, దక్షత లేక పోతే ఆ రహస్యం తెలిసినా వ్యాపారం నిలబడదూ" అని.
నిజమే అనిపించింది పంతులుకి, నెమ్మదిగా తన వ్యాపారాన్ని తనే  మూసేసాడు. తనని నమ్ముకున్న పని వారందిరికీ ఒక దారి చూపించాడు. ఇక ఏ వ్యాపకం లేకపోవడం, ఆరోగ్యం సన్నగిల్లడం, వల్ల పూర్తిగా మంచాన పడ్డాడు.
'ఆనాయేసేన మరణం ,వినా దైన్యేన జీవనం" ఉండాలనేవాడు ఎప్పుడూ. అందుకే మంచాన తీసుకుని, పోకుండా చూడ మని ఆ దేవుణ్ణి మనసులోనే ప్రార్ధించేవాడు.

ఇహనో ఇప్పుడో అన్నట్లుంది ప్రాణం.

శ్వాస ఎగ తంతోంది, ఎక్కిళ్ళు పెచ్చు మీరాయి. అయినవాళ్ళందరూ ఒక్కొక్కరే వచ్చారు.
తులసి తీర్థం తెచ్చారు. అతడి కళ్ళల్లో ఏదో బాధ. చెప్పలేకపోతున్నాడు. ఆవిడే ఉంటే చప్పున తెలుసుకునేది.
పెద్ద కూతురంది, తులసి నీళ్ళు కాదు టీ పట్రండని. ఎలా తెస్తారు? ఈ మనిషి జీవితంలో ఎవరు టీ చేసినా తాగలేదే?
ఐనా ధైర్యం చేసి తెచ్చారు. తాగలేదు. కట్ట కడపటి మనవరాలు వచ్చింది. ఆమె బాగా తయారు చేస్తుందని పేరుంది , ఈ సారి ఆమె చేసిచ్చింది, తాగాడు. మొదటి గుక్క లోనే కళ్ళళ్ళో ఏదో మెరుపు.
ఇది అచ్చం తను చేసుకునే టీ లానే ఉంది. ఇదివరకెన్నడూ ఎవరూ ఈ ముక్క చెప్పలేదు తనకి. బాగా చేస్తుందని తెలుసు కానీ తన లా..
దైవికమే అనుకున్నాడు. అలా ఆ టీ తాగుతూనే , ఏ టీ ని తన రక్తం లో , జీవితం లో , మనసులో నింపుకుని బ్రతికాడో, అదే టీ తాగుతూ .. తృప్తిగా ..
అలా నే ఒరిగి పోయాడు.
ఆ మనవరాలికీ తెలియదు ఆ రోజు తను చేసిన టీ అచ్చు గుద్దినట్లు తాత టీ లానే ఉందని. మళ్ళా ఎప్పుడు తను టీ చేసినా,ఆ ప్రాంతం లో ఎవరు టీ చేసుకున్నా తేయాకు పంతులు టీ లా లేదనుకునే వారు.





23, మే 2019, గురువారం

ఏమో గుర్రం ఎగరావచ్చు - పునః పరిశీలన

2017 ఆగస్ట్ లో రాసిన పోస్టు. నేటి ఫలితాల సందర్భంగా ... ఆ రోజు అనుకున్నట్లే అమ్మ పార్టీ NDA లో చేరింది. బాబు మోదీ విడిపోయారు....చూద్దాం ఇంకేం జరుగుతాయో ఈ రోజు..

రాజకీయ బేతాళం:

"ఇవాళ వెంకయ్యనాయుడు సింహాసనం అధిష్టించాడు తెలుసా?" న్యూస్ పేపర్ లో వఛ్చిన వెంకయ్యనాయుడు ఫుల్ సైజు ఫోటోలు చూపిస్తూ అన్నాను బామ్మతో.

వెంకయ్యనాయుడు ఉపరాష్ట్రపతి గా ఎన్నికైన రోజు ఆవిడ చాలా సంబర పడిపోయింది.

"ఏంటీ సింహాచలం వెళ్ళాడా? ఎందుకు వెళ్ళడూ, రాష్ట్రపతులు, ఉపరాష్ట్రపతులూ ఊళ్ళు పట్టుకు తిరగడం మామూలేగా" అందావిడ.

"సింహాచలం కాదే, సింహాసనం ఎక్కాడంటున్నా" అన్నాన్నేను.

"ఓ అదా. తెలుగువాడికి ఈ పదవి వచ్చిందన్న మాటే గానీ, మనకి ఒరిగేదేమీ లేదు రా."

"ఎందుకు లేదూ, పవర్‌ఫుల్ పదవే కదా, తెలుగు రాష్ట్రాలకి రావాల్సినవన్నీ రప్పిస్తాడు లే."

బామ్మకి రాజకీయ జ్ఞానం ఎక్కువే అందుకే ఒప్పుకున్నట్లు కనపడలేదు. ఏదో రహస్యం కనిపెట్టినట్లు గా చెప్పటం మొదలు పెట్టింది.

"అదే రా మోదీ జీ గారి తెలివి. ఇన్నాళ్ళూ మనకీ, కేంద్రానికి మధ్య ఉన్న లింకు ఈ వెంకయ్య నాయుడు గారే, ఆయనే ఏదైనా నిల దీసినా, నిధులు కోసం పోట్లాడినా నూ. ఇప్పుడాయన్ని తీసి, పార్టీలకతీతం గా పని చేయాల్సిన పోస్టు లో వేసేసి, ఆ లింకు తెగ్గొట్టారు. బి జె పీ కి సొంత బలం ఉంది కాబట్టి, చంద్ర బాబు ఆట్టే ఒత్తిడి పెట్టలేడు. పనిలో పని గా, ఆంధ్రా కీ, తెలంగాణాకీ చెరో సీనియర్ గుజరాతీ నీ గవర్నరు గా పంపించి నిఘా పెట్టిస్తాడు. తెలుగు, తమిళ రాష్ట్రాల్లో పార్టీ పట్టు పెంచుకునే ప్రయత్నాలు ఎలాగో ముమ్మరం చేసేసారు. ఇక వచ్చే ఎలక్షన్ల లో పార్టీ ఎమ్మెల్యే, ఎంపీ ల సంఖ్యా, ఓట్ పెర్సంటేజీ పెంచుకోవడానికి శత విధాల కృషి చేస్తారు. తెలుగు రాష్ట్రాలకి ఏదైనా మంచి చేయదలచుకుంటే, అది ఎలక్షన్లకి ముందు చేసి, ప్రజల వద్ద ఇంప్రెషను కొట్టేస్తారు."

"ఆ ఇదంతా, వట్టి భ్రమ, వచ్చే మంత్రివర్గ విస్తరణలో దక్షిణాది వారికే ప్రాధాన్యంట" కొట్టి పారేశాన్నేను.

"ఏంటీ దక్షిణా మూర్తి స్తోత్రమా, ఇక మనకి మిగిలిందదే." నవ్వుతూ అంది బామ్మ.

"దక్షిణా మూర్తి కాదే, మంత్రి వర్గ విస్తరణ లో దక్షిణాదికి పెద్ద పీట వేస్తారుట."

"విస్తరణ లో పెద్దపీటా? నితీశ్ కుమారుకి , అమ్మ పార్టీ వాళ్ళకి పోను, మిగిలినవెన్ని? అందులో వచ్చేవెన్ని, పోయే వెన్ని?" బామ్మ భవిష్యత్తు చెప్పేస్తోంది.

"అమ్మ పార్టీ వాళ్ళు కూటమి లో లేరు కదే?" సందేహానుమానం వెలిబుచ్చాను.

"అదెంత పని రా, రాష్ట్రపతి ఎన్నికల్లో మద్దతిచ్చిన వాళ్ళందరూ, కూటమి లో ఉండే ఇచ్చారా? నితీశ్  చేరలేదూ.ప్రాంతీయ పార్టీల్లో ఎవరికి గెలిచే అవకాశాలుంటే వాళ్ళందర్నీ కూటమిలో చేర్చేసుకోవడం వాళ్ళకి ఓటు తో పెట్టిన విద్య. వచ్చే ఎలక్షన్ల లో బాబు ని దూరం పెట్టి, జగన్ని చేరదీయ వచ్చు, అమ్మ పార్టీని కూటమి లో చేర్చుకోవచ్చు, గెలవడానికి ఏదైనా చెయ్యవచ్చు."

"బాగుంది నీ చిలక జోస్యం, మోదీ, బాబూ విడిపోవడం కల్ల" ఒప్పుకోదలచుకోలేదు నేను.

"98లో అమ్మ ఎక్కడుంది? కూటమిలో లేదూ? గోద్రా తర్వాత బాబు కూటమి నుండి వెళ్లిపోలేదూ? మొన్నటికి మొన్న ఈ నితీశే మోదీ తో తెగతెంపులు చేసుకొని మళ్ళీ కలిసి పోలేదూ? రాజకీయాల్లో శాశ్వత మిత్రులూ, శత్రువులూ ఉండరని నీకు తెలియదట్రా."ఏమో గుర్రం ఎగరావచ్చు..."

22, మే 2019, బుధవారం

మహానుభావుడు

నెల రోజుల నాడు కాఫీ షాప్ లో చూశాను అతణ్ణి. చూసినప్పుడే అనుకున్నా పెద్ద సైకో అయి ఉంటాడని.
ఆ రోజు ఎప్పట్లానే తల వంచుకుని ఫోన్ చూసుకుంటూ కాఫీ షాప్ కొచ్చాను.
ఇది డిజిటల్ కాఫీ షాప్, అంటే కస్టమర్ మాట్లాడాల్సిన పనే లేకుండా, యాప్ లో ఆర్డర్ చేసి, పే చేస్తే, ఒక రోబో  టేబుల్ దగ్గర కాఫీ సర్వ్ చేస్తుంది.
అంతా నిశ్శబ్దం, ఒంటరి గాళ్ళైనా, జంటలైనా, గుంపులైనా, తల వంచుకుని, ఎవరి ఫోన్ లతో వాళ్ళు బిజీ గా వుంటూ కాఫీ ఎంజాయ్ చేస్తుంటారు.

ఇదీ ఒక ధ్యానం లాంటిదే.

ఆ మధ్య, ఇలానే ఇదే కాఫీ షాప్ లో ఉన్నప్పుడు, పాత ఫ్రెండొకడు టచ్ లో కొచ్చాడు.
ఈ షాప్ లోనే ఉన్నానంటూ లొకేషన్ కూడా పంపించాడు.వాట్సాప్ లో హాయ్ అంటూ ఈమోజీ పంపి, లేటెస్టు పిక్ పంపించా.
వాడు కూడా వాడి లేటెస్ట్ పిక్ పంపాడు. చెప్పొద్దూ, చాలా హేపీగా ఫీలయ్యా. ఈ వాట్సాప్ పుణ్యమా అని, మళ్ళీ  వాడి  ని చూసే భాగ్యం దక్కింది.
ఈ వాట్సాపే లేకపోతే, తల ఎత్తి, వాడిని చూసి, వాడి దగ్గర కెళ్ళి మాట్లాడాల్సొచ్చేది. అదంతా ఓల్డ్ ఫేషన్.

ఇంతకీ ఆ సైకో సంగతి చెప్పాలి కదూ.

తపోభూమి ని తలపించే ఈ కాఫీ షాప్ లో ఒక రోజు ఒక పే...ద్ద నవ్వు వినిపించింది. సాధారణం గా అయితే, నాతో కాఫీ తాగడానికొచ్చే స్నేహితులు కూడా, ఏదైనా జోక్ చెప్పాల్సి వస్తే వాట్సాప్ లో పంపిస్తారు. బాగా నవ్వొస్తే వెంటనే నేను కూడా నాలుగు లోల్ ఈమోజీలో , ఆర్వో్ ఎఫెల్ ఈమోజీ లో 🤣🤣 పంపిస్తా. ఎంత కల్చర్డ్ గా వుంటుందీ ఈ రియాక్షన్. అంతే గానీ అలా పడీ పడీ నవ్వడమేమిటి, నాన్సెన్స్.

అతనలా నవ్విన వెంటనే, అక్కడున్న అందరూ అదిరిపడ్డారు. కొందరైతే టెర్రరిస్టు ఎటాకనుకుని ప్రాణభయంతో కంగారుగా ఫేస్ బుక్ లో, వాట్సాప్ లో స్టేటస్ లు కూడా పెట్టేసారు.

వాళ్ళకొచ్చిన కామెంట్లూ, లైకులూ భయం భయంగా చూసుకుంటూ ఉండిపోయారు.
నాకు చుట్టూ ఉన్న సమాజం ముఖ్యం  కాబట్టి నేను మొదటి సారి తల ఎత్తి చూసా అతగాడిని.

ఏ గ్రహం నుంచి ఊడిపడ్డాడో మహానుభావుడు, చేతిలో ఓ స్మార్ట్ ఫోన్ కూడా లేదు పైగా పుస్తకమొకటి. ఒకప్పుడు చదివేవారట కాగితాలతో చేసిన పుస్తకాలు. ఇప్పుడంతా డిజిటలే. ఎంతకీ సైరన్ కూతలూ అవీ వినపడకపోవడంతో ప్రమాదమేమీ లేదని తెలుసుకుని కొంతమంది అతడితో సెల్ఫీ లు కూడా దిగుతున్నారు. ఈ ఏలియను తో ఫొటో దిగాలనిపించి నేనూ దగరకెళ్ళాను. నన్ను చూసి చిన్నగా నవ్వాడు కూడా. నేను కూడా అతడిని చూసి లోల్ అన్నాను. అర్ధం కాలేదనుకుంటా గురుడికి. నేను నవ్వుకి బదులు ఈమోజీ లాంగ్వేజీ వాడబట్టి చాలా కాలమైంది.

సరిగ్గా అప్పుడే గమనించాను అతడి శరీర నిర్మాణం కూడా అందరిలా లేదు. ఒక చేయి రెండో చేతి కంటే పొడవుగా, పొడుగ్గా ఉన్న  చేతికి బొటన వేలు కూడా మిగతా వేళ్ళంత పొడవుగా,సెల్ఫీ లు తీసుకోడానికి వీలుగా ఉంది. అంతేకాదు అతని మెడ కూడా ఒక వైపుకి ఒంగి పోయి ఉంది.

ఎవరూ పెద్దగా పట్టించుకున్నట్టు లేరు ఈ విషయాన్ని. నాకు మాత్రం మొదట ఆశ్చర్యం, తర్వాత భయం వేశాయి. చెప్పొద్దూ, వెంటనే వాట్సాప్ స్టేటస్ అప్‌డేట్ చేసా. ఫీలింగ్ కన్‌ఫ్యూస్‌డ్ అని.

అతనే అన్నాడు "నన్ను చూసి ఎందుకు అందరూ భయపడుతున్నారు?"

"ఇంత పెద్దగా నవ్వడం ఎప్పుడూ ఎవ్వరూ ఈ మధ్య కాలం లో విని వుండరు అందుకే"  అన్నాను.

"అవునా!" ఆశ్చర్యంగా అన్నాడు.

ఇంతలో అటుగా ఓ టీనేజీ కుర్రాడొచ్చాడు. "నీ చేతిలో డివైస్ ఏంటి? దీన్ని ఎలా ఆపరేట్ చేస్తారు? వై దేర్ అర్ నో బటన్స్ ఎట్ ఆల్ ?" అతి కష్టంమీద మాట్లాడుతున్నట్లడిగాడు పుస్తకాన్ని చూపిస్తూ.

"దీన్ని పుస్తకం అంటారు" అన్నాడు ఏలియన్ ఆ కుర్రాడి వైపు పుస్తకం జరుపుతూ.

"నీ చేతిలో ఉన్నది పుస్తకమని నా లాంటి సీనియర్ సిటిజనుకి తప్ప ఈ జనరేషన్ వాళ్లకి తెలియదు" అన్నానేను.

"డస్ ఇట్ నీడ్ పాస్వర్డ్?" ఉత్సాహంగా అడిగాడా కుర్రాడు.

"నో"

పుస్తకం చేతిలోకి తీసుకుని అటూ ఇటూ తిప్పుతూ అన్నాడా కుర్రాడు "బాటరీస్ ఎక్కడున్నాయి? ఈజిట్ సోలార్ పవర్డ్?"

"నో , దీనికి బాటరీస్ , పవర్ ఏమీ అక్కర్లేదు . ఇలా పేజీలు తిప్పుతూ చదవాలి " చూపించాడు.

"వావ్, ఈజ్  దిస్ రియల్ ? అనుకుంటూ తన స్మార్ట్ ఫోన్ లో ఫోటోలు తీసుకుని, ఆశ్చర్యం కంటిన్యూ చేసుకుంటూ వెళ్లి పోయాడు.

"ఏంటీ అతను పుస్తకాన్ని వింతగా చూస్తున్నాడు?" అన్నాడతడు.
"ఓ అదా! ఇప్పుడు స్కూల్స్ లో అంతా స్మార్ట్ డివైస్ లు వాడుతున్నారు, పరీక్షలు కూడా కంప్యూటర్ లోనే. అందుకే ఇప్పటి పిల్లల్లో చాలామందికి పుస్తకాలు తెలియవు." అన్నాన్నేను.
చిన్నగా నవ్వుకున్నాడతను.

ఇంతకూ నువ్వెవరు, చిన్నవాడి లానే ఉన్నావు కానీ స్మార్ట్ ఫోన్ లేదు. ఏలియన్ వా ?" అడిగాను .
"నేను భవిష్యత్తు లోంచి వచ్చాను"
"భవిష్యత్తు లోంచా ?" భయం గా అడిగాను .
"అవును అందుకే నా చెయ్యి ఇలా వుంది " అన్నాడు చెయ్యి చూపుతూ .
"ఫ్యూచర్ లో మనిషికి తినడానికి తిండి లేదు. తాగడానికి  నీళ్లు లేవు. విటమిన్లూ మినరల్సూ, లాగా అంతా ట్యాబ్లేట్లే . మాట్లాడడానికి కూడా నోరు వాడక పోవడం వల్ల , నోరు సైజ్ కూడా తగ్గిపోయింది"
అప్పుడు చూసా, అతని నోరు కూడా చాలా చిన్నగా ఉంది.
"ఫిజికల్ , వర్చువల్ స్క్రీన్  లు చూసి చూసి కళ్ళు కూడా చిన్నగా అయిపోయాయి.  పెద్దగా కష్ట పడే పని లేకపోవడం వల్ల , శరీరం కూడా గుండ్రం గా అయిపోయింది " అన్నాడు బాధగా.
"మీరు ఫ్యామిలీ తో కూడా మాట్లాడుకోరా?" అన్నాను
"లేదు, మాకు ఫ్యామిలీ కాన్సెప్టు లేదు. టెక్నాలజీ కి బాగా అలవాటు పడిపోయి, మాకు మనిషి లక్షణాలు పోయాయి. ఫెర్టిలిటీ కూడా లేదు. లైఫ్ ఎక్స్పెక్టెన్సీ బాగా పెరిగిపోయింది. పిల్లలు కూడా క్లోనింగ్ ద్వారానే పుడతారు.  జనాభా ని బట్టి ప్రభుత్వాలే ఇంతమందిని పుట్టించాలి అని శాంక్షన్ చేస్తారు."
"మరిప్పుడు ఇక్కడి కెందుకొచ్చినట్లు ?" అన్నాను.
"మా టైం లో మేము మనుషులుగా ఎందుకు పుట్టామో అర్ధం కాక చాలా మధన పడి పోయాం. మేమెందుకిలా అయిపోయాం అని రీసెర్చ్ చేసాం . "

"అయితే, తెలిసిందా?"
"ఆ రీసెర్చ్ లో మేమో టైం మెషీన్ కనిపెట్టి , గతం లోకి వెళ్లి చూసాం"
"ఏం అర్ధమయ్యింది?"
"మీ స్వార్ధం వల్లే మేమిలా మారామని తెలిసింది. మీరు చెట్లు నరికేశారు, నీళ్లు, ఆహారం లేకుండా చేశారు."
"మేమా! నాన్సెన్స్ .! ఇంత టెక్నాలజీ డెవలప్ చేసాం."
"నిజమే , కానీ ఆ టెక్నాలజీ ని మానవీయ కోణంలో అభివృద్ధిచెయ్యలేదు. అదే టెక్నాలజీ కాలక్రమేణా మనిషి తోటి మనిషితో కూడా మాట్లాడలేనంత డెవలప్ అయిపోయింది " అన్నాడు నిష్టూరం గా.
"నువ్వు పట్టుకున్న పుస్తకం కూడా మేము చెట్లు నరికి చేసిందే" అన్నాను నిజం ఒప్పుకుంటూ.
"ఇప్పుడు మాకు నరకడానికి చెట్లు కూడా లేవు, ఆ మాటకొస్తే పచ్చదనమే లేదు"
"ఇప్పుడేం చేద్దామని ?"
"ఏముంది?, భూమి మీద ఎక్కడైనా పచ్చదనం ఉంటే వెతికి , మొక్కలు చెట్లు పెంచాలని ఈ మధ్యే నిర్ణయించాం. టెక్నాలజీ సాయంతో మనుషులు తోటి మనుషులతో మాట్లాడే విధానం కనిపెడుతున్నాం. మనిషి గా ఉండడం వల్ల , మనిషి లో ఉండాల్సిన మానవత్వం , హృదయ మార్దవం ఆర్టిఫిషియల్ ఇంటెలిజెన్స్ ద్వారా డెవలప్ చేస్తున్నాం “
"అసలు మనిషంటే ఏంటో మీకెలా తెలుసు?" ఎంక్వైరీ చేశాను.
"మా తవ్వకాలలో కొన్ని పుస్తకాలూ,కొంత డేటా దొరికాయి. వాటిని అనలైజ్ చేసి హ్యూమన్ బిహేవియర్  అల్గారిథంస్ తయారు చేసాం. నా లాంటి కొంత మంది గతం లోకి వచ్చి మనుషులనీ, వారి పోకడలనీ గమనించాం. ఇవన్నీ ఆ అల్గారిథంస్ ని ఇంకా మెరుగు పరచడానికి వాడతాం.”
"నీ ప్రయాణం లో నీకేం తెలిసింది?"
"గతం లో మనుషులు డబ్బు కన్నా సాటి మనిషికి , స్వార్ధం కన్నా పరోపకారానికి ఎక్కువ విలువ ఇచ్చారనీ తెలుసుకున్నాను. సంఘ జీవనం లో క్రమేణా కులాలూ, మతాలూ తామే సృష్టించుకుని , తమ చుట్టూ తామే అనేక గిరులు గీసుకుని సాటి మనిషిని దూరం చేసుకున్నారు. టెక్నాలజీ వాడకం పెరిగి, తమకు తామే దూరం ఐపోయారు."
"అంటే మనిషి ని మళ్ళీ మనిషి లా తయారు చేయబోతున్నారన్నమాట "
"అవును, ఆ టెస్ట్ లో భాగం గా నేను ఇక్కడికొచ్చాను.  వచ్చిన పనైపోయింది , ఇక వెళ్తున్నా " అని మాయమై పోయాడు .

మనసంతా విచిత్రం గా వుంది. అతనిప్పుడు ఏలియన్ లానో, సైకో లానో అనిపించట్లేదు , నాలో ఆలోచనల సునామీ ని రేపి, నేనూ మనిషినే అని గుర్తు చేసిన మహానుభావుడు లా అనిపిస్తున్నాడు . 

16, మే 2019, గురువారం

అల్లుళ్ళు - శ్రీశ్రీ - సుఖ జీవన యానం


శ్రీశ్రీ గారి రచనల పై అభిప్రాయాలు వ్యక్తం చేస్తూ వచ్చిన సమీక్షలన్నీ దాదాపుగా అభినందన పూర్వకంగా ఉన్నవే తప్ప, వారి రచనలు సమాజానికి అంత ఉపయోగ పడవనే వాదన నేనెప్పుడూ వినలేదు. కానీ ఆ కాలం లోనే అటువంటి ఒక ఆలోచన ని వెలిబుచ్చిన ఒక ఉపోద్ఘాతం తటస్థించడమే ఈ టపా వ్రాయడానికి ప్రేరణ.

ఈ మధ్య ప్రైమ్ లో సంక్రాంతి అల్లుళ్ల సినిమా చూస్తుంటే, ఒక్కసారిగా ...

అత్తారింటికి వెళ్లి, మావగారి తో భోజనం చేసే వేళ అవుతోందని తెలిసీ, కాఫీ హోటలు కెళ్ళి ఇడ్లీలు తిని వచ్చి, మరి ఇక భోజనం చెయ్యలేక, మొహమాటం తో ఒళ్ళు కులాసాగా లేదని అబద్ధం చెప్పి, రోజంతా పస్తుండి, నానా అవస్థలూ పడ్డ సుందరమ్మ గారి అల్లుడు శర్మా….

సత్యవతి తలుపు వేగిరంగా తియ్యక పోగా, అనాల్సిన ఇంగిలీషు ముక్కలు అనలేదని తన అల్లుడు కృష్ణుడూ; ఇచ్చిన ఫలహారమూ, కాఫీ మొత్తం పుచ్చేసుకుని  ఠాంక్ ఠాంక్ మనాల్సిన మగడు అలా అనలేదని కూతురు సత్యవతీ, ఒకరిపై ఒకరు అలిగి, తనని హడలెత్తించిన ఉదంతాన్ని చర్చించుకున్న మంగమ్మా సుందరమ్మా ....

సరైన వయసులో తాలూకా ఆఫీసు లో చేరి ఉంటే, డిప్టీ కలెక్టరు అవ్వగలిగి ఉండీ,  జీతానికి వృద్ధి  అంటూ లేని మాస్టరీ పని చేస్తూ, పండక్కి కూసింత ముందుగానే వచ్చిన అల్లుడికీ, కూతురుకి, నెల బడ్జెట్ అంతా  వెచ్చించి బట్టలు కొని, మళ్ళా మరొక్కసారి పద్దు రాయించి అల్లుడికి బట్టలు కొనాల్సి వచ్చినా,  తాను మాత్రం రూపాయి కాసంత చిరిగిన ధోవతి ని ఠలాయించి కుట్టుకుని తొడుక్కుని, కొత్త బట్టలు కట్టుకున్న కూతురినీ, అల్లుడిని చూసి మురిసి పోయిన మావగారు ...

వీళ్లంతా గుర్తుకొచ్చి, వెంటనే చదివి చాలా కాలమైపోయిన ముని మాణిక్యం గారి అల్లుళ్ళు పుస్తకం తెరిచాను.

ఒకప్పుడు, మొక్కపాటి వారి బారిష్టరు పార్వతీశం మొదటి భాగం చదివి ఆనందించాక, రెండవ భాగం అంత హాస్య స్ఫోరకం గా అనిపించక పోవడం చేత, ఇక వారి రచనల పట్ల ఆసక్తి కలగలేదు. వీరూ, సదరు ముని మాణిక్యం వారూ (ఇద్దరూ నరసింహులే కావడం వల్ల అనుకుంటా) ఒక్కరే నని భ్రమించి, ఈ అల్లుళ్ళు పుస్తకాన్ని చాలా కాలం విస్మరించేను కూడా.
ఇక యుక్త వయసులో మహాప్రస్థానానికి చలం రాసిన యోగ్యతా పత్రం చదివాక, నేను చాలా పుస్తకాలకున్న ముందుమాటలు చదవడం మానుకున్నాను. ఎందుకో ఇహ ఇంతకు మించిన ముందు మాటలుండవనే అనుకున్నాను. అలానే ఈ అల్లుళ్ళు ముందుమాటను కూడా చదవలేదు అప్పట్లో.

 ఈసారెందుకో ముందు మాట చూస్తిని కదా, శ్రీశ్రీ వారు దర్శనమిచ్చారు మొదటి రెండు పంక్తుల్లోనే.
"దారి పొడుగునా గుండె నెత్తురులు
తర్పణ చేస్తూ పదండి ముందుకు!"
అని శ్రీశ్రీ అంటే,
"నేను ఎక్కడికీ పొమ్మనను, ఇంట్లోనే ఉండమంటాను.  ఒకవేళ ఏదైనా పని మీద, ఎక్కడికైనా వెళ్ళినా సాయింత్రానికి ఇంటికి వచ్చి , ఆవిడ ఇచ్చిన కాఫీ పుచ్చుకొని పిల్లలతో, హాయిగా ఆడుకొంటూ కాలం గడపమంటాను" అంటారు ముని మాణిక్యం.

నెత్తురు వాగులూ, ఆకలి ఏడ్పులూ నాకు కనిపించవు, వినిపించవు అంటారాయన. ఏదో కలో అంబలో త్రాగి ప్రతీవాడూ, తృప్తి తోనూ, ఆనందంతోనూ,హాయిగా జీవిస్తున్నట్లు తోస్తుందాయన మనస్సుకి.

జీవితం లో సుఖ దుఃఖాలు ఈనాడు కొత్తగా రాలేదు, ఎప్పుడూ ఉన్నవే. ఏడ్చి ఏమి లాభం?
జీవితంలో తృప్తీ ఆనందమూ ఉంటే ఈ ఏడ్పులు తగ్గిపోవూ?

నిజానికి నడివయసుకొచ్చాక, యవ్వనం లో ని ఆవేశ కావేశాలు తగ్గి, సంసార సాగరం లో ఎదురీత ఈదే సామాన్యులకి ముని మాణిక్యం వారి అభిప్రాయం సరైనదేననిపించక మానదు.

"ప్రతీ అన్యాయానికి స్పందించాలని మధ్యతరగతి వాడు అనుకున్నా, పాపం వాడికి సెలవున్న రోజున, కోర్టుకి కూడా సెలవే" అని ఎక్కడో విన్నట్లు గుర్తు.  అందుకనే చిన్న చిన్న ఆనందాల్లో సంతోషాన్ని వెతుక్కుంటూ, సుఖ జీవన యానం చేసేద్దాం.

అల్లుళ్ళు ఆన్లైన్ లో చదవాలనుకుంటే scribd లో ఉంది చూడండి.




8, మే 2019, బుధవారం

మంచోళ్ళు


"హిట్లర్ మంచి పరిపాలకుడు. ఆయన ప్రజలను కన్న బిడ్డల వలె పాలించెను."
"ఒరేయ్! ఏమిటా పిచ్చి కూతలు, హిట్లర్ ఎలాంటివాడో ప్రపంచమంతా తెలుసు."
"కానీ నీకే తెలీదు ఆత్రేయ గారేం చెప్పారో"
"నాకేం చెప్పలేదు"
"నాకు చెప్పారు లే పోయినోళ్ళంతా మంచోళ్ళు  అని"
"అయితే మాత్రం హిట్లర్ ని కూడా పొగడాలా"
"ఖచ్చితం గా, ఎలాంటి నాయకులైనా, ఎంత పెద్ద కేసులున్నవారైనా, వాళ్ళు పోయాకా పొగడి తీరాలి."
"వీల్లేదు, ఉన్నదున్నట్లు గా చెప్పాల్సిందే."
"నువ్వు సంఘీ వా?"
"కాదు సామాన్యుణ్ణి ."

--Modi comments on Rajiv

6, మే 2019, సోమవారం

నయా నేషనలిజం



"దేశమును ప్రేమించుమన్నా మంచి అన్నది పెంచుమన్నా"
"నువ్వు ఈ దేశం లో పుట్టి పెరిగావా?"
"అవును"
"నువ్వు ఈ దేశ పౌరుడివేనా?"
"కాదు"
"అయితే నీకీ పాట పాడే అర్హత లేదు"
"అరె నేను ఇక్కడే ఉంటున్నా, పని చేస్తున్నా, పన్నులూ కడుతున్నా"
"ఐనా సరే, నీకా అర్హత లేదు"
"మరి, షెహజాదా, రాజ మాత .."
"ఏం పర్లేదు, మాకు విదేశీ పాలన అలవాటే, నువ్వు మాత్రం ఈ దేశాన్ని ప్రేమించకూడదు"
"నువ్వు ఏ పార్టీ వాడివో నాకర్ధం అయ్యింది"
"నువ్వు ఏ పార్టీ వాడివో నాకూ అర్ధం అయ్యింది"
"నాకు ఓటు హక్కు కూడా లేదు, ఇంకా పార్టీ ఏమిటి? నేను విపత్తు సమయాల్లో, ప్రజల కోసం చాలా విరాళాలిచ్చాను"
"అవన్నీ నువ్వు నా దేశం లో పన్ను లు ఎగ్గొట్టానికి చేసిన జిమ్మిక్కులు"
"నువ్వు నిజం గా దేశభక్తుడివేనా?"
"అది నీకనవసరం, కానీ నువ్వు మాత్రం  ఈ దేశాన్ని ప్రేమించడానికి వీల్లేదు"

---- ఈ మధ్య ఓ నటుడి పౌరసత్వం గురించి సోషల్ మీడియా లో జరుగుతున్న రచ్చ ప్రభావం

26, ఏప్రిల్ 2018, గురువారం

నయా వైకుంఠం


తెలుగు అసోసియేషన్ ఆఫ్ లండన్ వార్షిక సంచిక లో నా కథ  ప్రచురించిన సంపాదకులకు ధన్యవాదాలు.

అల వైకుంఠ పురంబు లో, నగరి లో, అని పోతన గారు చెప్పినట్లే, భక్త వల్లభుడా శ్రీహరి శేష పాన్పు పై పరుండి, ఏదో ఆలోచిస్తూ ఉండగా, త్రిలోక సంచారియైన నారదుడు శ్రీవారి దర్శనార్థం వచ్చాడు.
"కలహ భోజనా, ఏమి విశేషాలు?"
"హరి హరీ! మీరూ ఆమాటే అంటే ఎలా యదునందనా? నేను ఏమి చేసినా లోక కళ్యాణార్ధమే యని తమరెరగని సత్యమా."
"ఇంతకీ విషయం చెప్పమనండి ప్రభూ" అంటున్న అమ్మవారి మాట విని, నారదుడు
"నరలోక విచిత్రాలు వివరిద్దామనొచ్చాను ప్రభూ."
"మరల వియోగం తప్పదు కాబోలు" అనుకున్నది అమ్మ వారు, పద్మావతీ వృత్తాంతం తలచుకొని.
"అక్కడచూసిన వైకుంఠ వైభోగం తమరు చూసి తీరవలసింద"న్నాడు నారదుడు.
"మర్త్యలోకమున మరొక వైకుంఠ మా!" ఆశ్చర్యం ప్రకటించాడు అరచేయి చూసుకుంటూ కపట నాటక సూత్ర ధారి.
"అలనాడు త్రేతాయుగంలో తమరు వానరులకిచ్చిన వర ప్రభావమున, తామరతంపరగా పుట్టుకొచ్చిన రాజకీయ నాయకులు, ఐదేళ్ల కొకసారి చూపే అరచేతి లో వైకుంఠం కాదు ప్రభూ నేను చూసినది" అన్నాడు అయ్యవారిని గమనించి.
"మరి?"
"ఒక వైకుంఠం కాదు ప్రభూ, కోటాను కోట్ల వైకుంఠాలు. మానవుల అరచేత మొలిచిన అద్దం కథ. "
"మొదట వైకుంఠ మన్నావు, ఇప్పుడు అద్దం అంటున్నావు. తికమక పెట్టక వివరం తెలుపుము నారదా!" అదిలించారు శ్రీవారు.
"అక్కడే ఉంది కిటుకు ప్రభూ. అది మామూలు అద్దం కాదు. అది సమస్త లోక విషయ విశేషాలు చూపగలదు. స్వర్గమూ నరకమూ, మంచీ చెడూ, దేవ దానవ రీతులూ దాని యందు గలవు. మనిషి సృష్టించిన పదిహేనవ లోకమూ దాని యందే కలదు."
"పదిహేనవ లోకమా?"
"అవును జనార్దనా, దానిని జాల లోకమందురు. దైత్యులందరునూ అచ్చట తిష్ఠ వేసుకునుండి, మానవులనిక్కట్ల పాల్జేయు చుంటిరి. జయ విజయులచ్చటనూ ద్వారపాలకులు గా వర్ధిల్లు చున్నారు. వారినచ్చట ఫేస్బుక్ ,వాట్సాప్ లందురు. వీరు మానవ జాతికి తెచ్చు అనర్ధములు చెప్పనలవి కాదు.
గరుత్మంతుని కంటే బలమైన పక్షి యొకటి దాపురించినది. అది సత్యాసత్య ప్రమేయములు లేక అనేకానేక వార్త లను ప్రచారము గావించుచూ మనుషులను పట్టి పీడించు చున్నది.దానిని ట్విట్టరందురు. వీరే గాక నాళికా సురుడు 'యూట్యూబ్' అను పేర, చిత్రపటాసురుడు 'ఇన్స్టాగ్రాం' అను పేర దిన దినాభి వృద్ధి చెందుతున్నారు.వీరి తో పాటు అనేకానేక పేర్లతో పెక్కురు రక్కసులచట పేట్రేగిపోవుచుంటిరి.
కొందరు లక్ష లైకుల నోము, కోటి ఫాలోయర్ల వ్రతము యను విచిత్ర పూజా విధానములను కనిపెట్టి, లోకులను ప్రలోభ పెట్టుచూ పబ్బము గడుపుకొనుచున్నారు.
క్రొంగొత్త ప్రాతః పఠనీయ మంత్రములనూ కనిపెట్టుచున్నారు. నేడట్టి  ప్రార్ధనా మంత్రమొకటి నా చెవిన పడ్డది.
కరాగ్రే వసతే వాట్సాప్
కర మధ్యే ఫేస్బుక్
కర మూలే స్థితా ట్విట్టర్
ప్రభాతే జాల దర్శనం.

మనుజులు వీరి ప్రభావమునకు లోనై, దుర్బలురై, మనోవిచారములతో, దుఃఖములతో బాధ పడుచున్నారు. వీరికి విముక్తి లేదా? వారి ఇక్కట్లను తొలగించుటకు మీరే ఏదైనా మార్గము చెప్పండి ప్రభూ.

అది విన్న మాధవుడు, "నారదా! పెరుగుట విరుగుట కొరకే యను లోకోక్తి నీకు తెలియనిది కాదు. జాలాసుర సృష్టి శివాజ్ఞ లేకుండా జరిగినది కాదు, ఆతని వలన పెక్కు ప్రయోజనములుండుటా కల్ల కాదు. మానవులొట్టి అమాయకులు. వారికెయ్యది ఎటుల ఉపయోగించుకోవలెనో తెలియదు.
జాలాసుర భంజనమునకై పరమశివుని అంశతో వైరస్ అను శక్తి ప్రజ్వరిల్లుచూ ఆ దైత్యులను ఇప్పటికే హడలెత్తించు చున్నది. ఇది కాక హ్యాకింగను మరొక శక్తి కూడా శాయ శక్తులా కృషి చేయు చున్నది. అసురుల పాపము పండువేళ, వీరి శ్రమ కొకనాడు విజయము లభించుట తధ్యము. అంత వరకూ మనుజులు, నిర్జాలీకరణ వ్రతము చేయ వచ్చును”

"నిర్జాలీకరణ వ్రతమ నగా యేమి? అది యెట్లు చేయవలెను?"

నారదా, దుర్లభమగు ఈ వ్రతము మనుజులందరూ చేయ తగినది. అన్ని మతముల వారూ, కులముల వారూ, అన్ని జాతుల వారూ, అన్ని వయసుల వారూ చేయవచ్చును.ఆది వారము నాడు గాని, మరే రోజైననూ గానీ, ఈ వ్రతము చేయ వచ్చును. ప్రాతః, సంధ్యాదులలో ,యే వేళనైననూ చేయ వచ్చును. దీని వలన మానవులకు వారు కోల్పోయిన నిజ జీవితము లభ్యమగును. ఎంచుకున్న సమయము నందు, వీరు నిశ్చింతగా జాల ప్రసారము చేయు చర వాణులనూ, ఇతర పరికరములనూ ఆపి వేయ వలయును. అట్టి సమయమును వారు పిల్లలతో, కుటుంబ సభ్యులతో, స్నేహితులతో గడప వలయును. ఇది వారమునకెన్ని మార్లయిననూ చేయవచ్చును. ఇది సమస్త లోకములకూ ఆనంద దాయకము. 
*********శుభం ***********


24, జనవరి 2018, బుధవారం

శ్రీశ్రీ ఇజం


క్రింది వీడియోలో చంద్రబోసు గారు తన పూర్వ కవుల గురించి అపూర్వమైన మాటలు చెప్పేరు.








వాటిలో నాకు బాగా నచ్చినవి శ్రీ శ్రీ గారి గురించి చెప్పిన మాటలు. 
"కవితయను కన్య కి, పోరాట పురుషునికి పెండ్లి చేసిన పురోహితుడు శ్రీ శ్రీ”. 

అప్పటికే విప్లవ సాహిత్యం ఉన్నా (అరసం, విరసం ఉన్నాయేమో తెలియదు), దాన్ని లూప్ లైన్ నుంచి మెయిన్ లైన్ లో కి లాక్కొచ్చి, ఉరుకులూ పరుగులూ పెట్టించాడు. ఉర్రూతలూగించాడు. చాలా మందిని విప్లవ సాహిత్యం చదవడానికి, రాయడానికి ప్రేరేపించాడు. యోగ్యతా పత్రం లో చెలం చెప్పినట్టు, "రాబందుల రెక్కల చప్పుడు, పయోధర ప్రచండ ఘోషం, ఝంఝానిల షడ్జధ్వానం" గుండెల్లో మోగించాడు.

పాతికేళ్ల నాడు, చాలా మంది దిగువ మధ్యతరగతి టీనేజర్ల లానే నేనూ ఆయన భావాలకి దగ్గరయ్యాను.
శ్రీ శ్రీ పడికట్టు పదాలు ఎంత గొప్పవంటే, నాలాంటి అర్భకులు కూడా,ఇప్పుడు, ఈ కాలం లోఆ పదాలను వాడినా, అచ్చు వేసేంత గొప్పవి. 
గతేడాది తెలుగు వెలుగు లో నా కవిత కేవలం ఆ పదాల వల్లే అచ్చైందనిపిస్తుంది.


శ్రీ శ్రీ  ని సరిగ్గా అర్ధం చేసుకున్నాడో లేదో కూడా తెలియకుండానే, కేవలం శ్రీ శ్రీ  రచనా శైలి తో గుడ్డి ప్రేమ లో పడిన అప్పటి టీనేజీ కుర్రాడి రచన ఇది. చదివాక నవ్వొస్తే మీ తప్పేం లేదు, చాలా వాటికి క్షమించాలి నన్ను.



మరో ప్రపంచపు జ్వాలల నుంచీ,
రుద్ర విపంచుల ధ్వానం నుంచీ,
రుధిరాక్షరాల సత్యం నుంచీ,
వేదం నుంచీ - స్వేదం నుంచీ,
ఖేదం నుంచీ - మోదం నుంచీ,
నాదం నుంచీ- గానం నుంచీ,
రాగం నుంచీ,
జాలు వారాలి కవనం,
కళ్ళు తెరవాలి జనం,
కుళ్ళి పోవాలి కులం,
పారిపోవాలి మతం,
అంతమవ్వాలి అన్యాయం,
వెల్లువెత్తాలి ప్రభంజనం,
భారతి కావాలి నందనవనం.


వీడియో సేకరణ : వాట్సాప్

23, ఆగస్టు 2017, బుధవారం

సంఘర్షణ

ఆకాశవాణి విజయవాడ వారి భావచిత్రాలు (25/01/1998) లో ప్రసారమైన కవిత.

భావచిత్రాల్లో రెండు పంక్తులు ఇస్తారు. వాటిని ఉపయోగిస్తూ ఒక వచన కవిత వ్రాయాలి. 
"నూరు పూలు వికసించనీ
వేయి ఆలోచనలు సంఘర్షించనీ " 


ఈ పంక్తులని ఉపయోగిస్తూ నేను పంపిన కవిత ఇది.  ప్రసారం చేసిన ఆకాశవాణి వారికి ధన్యవాదాలతో.  
సంఘర్షణ 

చుక్కల్లో ఆదర్శాలు లెక్కిస్తూ ,
మెరుపుల్లో ఆవేశాన్ని వీక్షిస్తూ ,
లక్ష్యాలను విస్మరించి,
మార్గం మరచి,
యువతా!,
ఈ ముళ్ల దారినా నీ సంచారం?
అపశృతులు నిండిన ఈ గేయాలా నీ సంగీతం?
కాల్చే ఆకలీ , కూల్చే వేదనా 
కనిపిస్తోందా ఈ గాయం?
ఏమైందీ?
స్వాతంత్ర్య సమరానికి ఊపిరులూదిన యువ చైతన్యం?
నవ భారత నిర్మాణానికి పునాది వేసిన ఆ సౌగంధం?
నవ కవనం-చైతన్యానికి
నవ భువనం - ఇనోదయానికి 
యువ యోధులు-అభ్యుదయానికి 
కావాలోయ్ సమాజానికి. 
నూరు పూలు వికసించనీ,
వేయి ఆలోచనలు సంఘర్షించనీ,
గుండె కొండల్లో శాంతి నాదాలు ప్రతిధ్వనించనీ ,
జగాన్ని క్రమ్మిన స్వార్ధ మేఘాలు పాటా పంచలవనీ,
విశ్వమంతా దేశ కీర్తిని మార్మ్రోగనీ ,
ఒక్క పుష్ప వికాసం చాలు వసంతాన్ని ఆహ్వానించేందుకు 
ఒక్క ఆలోచన చాలు ప్రజా హృదయం లో చైతన్యం నింపేందుకు
మరో ప్రస్థానం ఆరంభించేందుకు. 

22, ఆగస్టు 2017, మంగళవారం

స్వాగతించరేం?



ఆకాశవాణి విజయవాడ వారి భావచిత్రాలు (30/11/1997) లో ప్రసారమైన కవిత.

భావచిత్రాల్లో రెండు పంక్తులు ఇస్తారు. వాటిని ఉపయోగిస్తూ ఒక వచన కవిత వ్రాయాలి. 
"పరుల కోసం పాటు పడని నరుని బ్రతుకు దేనికని ?
మూగనేలకి నీరందివ్వని వాగు పరుగు దేనికని?" 
ఈ పంక్తులని ఉపయోగిస్తూ నేను పంపిన కవిత ఇది.  ప్రసారం చేసిన ఆకాశవాణి వారికి ధన్యవాదాలతో.  
స్వాగతించరేం?

మార్చేయండి మానవ నైజాన్ని,
తిరగరాయండి మానుష చరిత్రని. 
ఇదిగో, ఇక్కడ,
బూజు పట్టిన విధానాల్ని దులుపుకుంటూ,
నిశి రాత్రిని వెన్నెలగా చూపే 
గాజు కళ్ళని నులుముకుంటూ,
అర్ధశతాబ్ది స్వాతంత్ర్యాన్ని 
ఆనందంగా హత్తుకుంటూ,
దారిద్ర్యపు వెలుగులో 
గత వైభవాన్ని చూసుకుంటూ,
రాజకీయుల వాగ్దానాలని 
తృప్తిగా నెమరేసుకుంటూ ,
గుండె గాయాల్ని 
వైప్లవ్య గేయాలుగా మార్చుకుంటూ,
  సమరశంఖం పూరిస్తూ ,
గర్జిస్తూ ,
ప్రశ్నిస్తున్నాను. 
పరుల కోసం పాటు పడని నరుని బ్రతుకు దేనికని ?
మూగనేలకి నీరందివ్వని వాగు పరుగు దేనికని?
చైతన్యం కోసం ప్ర్రాణమివ్వని యువత శౌర్యమెందుకని?
బదులివ్వరేం?
భావిభారత బంగరు కలలని భుజానేసుకుని,
గంపెడాశతో వస్తున్నాను. 
స్వాగతించరేం?


14, ఆగస్టు 2017, సోమవారం

రాజకీయ బేతాళం - ఏమో గుర్రం ఎగరావచ్చు

"ఇవాళ వెంకయ్యనాయుడు సింహాసనం అధిష్టించాడు తెలుసా?" న్యూస్ పేపర్ లో వఛ్చిన వెంకయ్యనాయుడు ఫుల్ సైజు ఫోటోలు చూపిస్తూ అన్నాను బామ్మతో.

వెంకయ్యనాయుడు ఉపరాష్ట్రపతి గా ఎన్నికైన రోజు ఆవిడ చాలా సంబర పడిపోయింది.

"ఏంటీ సింహాచలం వెళ్ళాడా? ఎందుకు వెళ్ళడూ, రాష్ట్రపతులు, ఉపరాష్ట్రపతులూ ఊళ్ళు పట్టుకు తిరగడం మామూలేగా" అందావిడ.

"సింహాచలం కాదే, సింహాసనం ఎక్కాడంటున్నా" అన్నాన్నేను.

"ఓ అదా. తెలుగువాడికి ఈ పదవి వచ్చిందన్న మాటే గానీ, మనకి ఒరిగేదేమీ లేదు రా."

"ఎందుకు లేదూ, పవర్‌ఫుల్ పదవే కదా, తెలుగు రాష్ట్రాలకి రావాల్సినవన్నీ రప్పిస్తాడు లే." 

బామ్మకి రాజకీయ జ్ఞానం ఎక్కువే అందుకే ఒప్పుకున్నట్లు కనపడలేదు. ఏదో రహస్యం కనిపెట్టినట్లు గా చెప్పటం మొదలు పెట్టింది.

"అదే రా మోదీ జీ గారి తెలివి. ఇన్నాళ్ళూ మనకీ, కేంద్రానికి మధ్య ఉన్న లింకు ఈ వెంకయ్య నాయుడు గారే, ఆయనే ఏదైనా నిల దీసినా, నిధులు కోసం పోట్లాడినా నూ. ఇప్పుడాయన్ని తీసి, పార్టీలకతీతం గా పని చేయాల్సిన పోస్టు లో వేసేసి, ఆ లింకు తెగ్గొట్టారు. బి జె పీ కి సొంత బలం ఉంది కాబట్టి, చంద్ర బాబు ఆట్టే ఒత్తిడి పెట్టలేడు. పనిలో పని గా, ఆంధ్రా కీ, తెలంగాణాకీ చెరో సీనియర్ గుజరాతీ నీ గవర్నరు గా పంపించి నిఘా పెట్టిస్తాడు. తెలుగు, తమిళ రాష్ట్రాల్లో పార్టీ పట్టు పెంచుకునే ప్రయత్నాలు ఎలాగో ముమ్మరం చేసేసారు. ఇక వచ్చే ఎలక్షన్ల లో పార్టీ ఎమ్మెల్యే, ఎంపీ ల సంఖ్యా, ఓట్ పెర్సంటేజీ పెంచుకోవడానికి శత విధాల కృషి చేస్తారు. తెలుగు రాష్ట్రాలకి ఏదైనా మంచి చేయదలచుకుంటే, అది ఎలక్షన్లకి ముందు చేసి, ప్రజల వద్ద ఇంప్రెషను కొట్టేస్తారు."

"ఆ ఇదంతా, వట్టి భ్రమ, వచ్చే మంత్రివర్గ విస్తరణలో దక్షిణాది వారికే ప్రాధాన్యంట" కొట్టి పారేశాన్నేను.

"ఏంటీ దక్షిణా మూర్తి స్తోత్రమా, ఇక మనకి మిగిలిందదే." నవ్వుతూ అంది బామ్మ.

"దక్షిణా మూర్తి కాదే, మంత్రి వర్గ విస్తరణ లో దక్షిణాదికి పెద్ద పీట వేస్తారుట."

"విస్తరణ లో పెద్దపీటా? నితీశ్ కుమారుకి , అమ్మ పార్టీ వాళ్ళకి పోను, మిగిలినవెన్ని? అందులో వచ్చేవెన్ని, పోయే వెన్ని?" బామ్మ భవిష్యత్తు చెప్పేస్తోంది.

"అమ్మ పార్టీ వాళ్ళు కూటమి లో లేరు కదే?" సందేహానుమానం వెలిబుచ్చాను.

"అదెంత పని రా, రాష్ట్రపతి ఎన్నికల్లో మద్దతిచ్చిన వాళ్ళందరూ, కూటమి లో ఉండే ఇచ్చారా? నితీశ్  చేరలేదూ.ప్రాంతీయ పార్టీల్లో ఎవరికి గెలిచే అవకాశాలుంటే వాళ్ళందర్నీ కూటమిలో చేర్చేసుకోవడం వాళ్ళకి ఓటు తో పెట్టిన విద్య. వచ్చే ఎలక్షన్ల లో బాబు ని దూరం పెట్టి, జగన్ని చేరదీయ వచ్చు, అమ్మ పార్టీని కూటమి లో చేర్చుకోవచ్చు, గెలవడానికి ఏదైనా చెయ్యవచ్చు."

"బాగుంది నీ చిలక జోస్యం, మోదీ, బాబూ విడిపోవడం కల్ల" ఒప్పుకోదలచుకోలేదు నేను.

"98లో అమ్మ ఎక్కడుంది? కూటమిలో లేదూ? గోద్రా తర్వాత బాబు కూటమి నుండి వెళ్లిపోలేదూ? మొన్నటికి మొన్న ఈ నితీశే మోదీ తో తెగతెంపులు చేసుకొని మళ్ళీ కలిసి పోలేదూ? రాజకీయాల్లో శాశ్వత మిత్రులూ, శత్రువులూ ఉండరని నీకు తెలియదట్రా."ఏమో గుర్రం ఎగరావచ్చు..."