నయా నేషనలిజం

"దేశమును ప్రేమించుమన్నా మంచి అన్నది పెంచుమన్నా"
"నువ్వు ఈ దేశం లో పుట్టి పెరిగావా?"
"అవును"
"నువ్వు ఈ దేశ పౌరుడివేనా?"
"కాదు"
"అయితే నీకీ పాట పాడే అర్హత లేదు"
"అరె నేను ఇక్కడే ఉంటున్నా, పని చేస్తున్నా, పన్నులూ కడుతున్నా"
"ఐనా సరే, నీకా అర్హత లేదు"
"మరి, షెహజాదా, రాజ మాత .."
"ఏం పర్లేదు, మాకు విదేశీ పాలన అలవాటే, నువ్వు మాత్రం ఈ దేశాన్ని ప్రేమించకూడదు"
"నువ్వు ఏ పార్టీ వాడివో నాకర్ధం అయ్యింది"
"నువ్వు ఏ పార్టీ వాడివో నాకూ అర్ధం అయ్యింది"
"నాకు ఓటు హక్కు కూడా లేదు, ఇంకా పార్టీ ఏమిటి? నేను విపత్తు సమయాల్లో, ప్రజల కోసం చాలా విరాళాలిచ్చాను"
"అవన్నీ నువ్వు నా దేశం లో పన్ను లు ఎగ్గొట్టానికి చేసిన జిమ్మిక్కులు"
"నువ్వు నిజం గా దేశభక్తుడివేనా?"
"అది నీకనవసరం, కానీ నువ్వు మాత్రం  ఈ దేశాన్ని ప్రేమించడానికి వీల్లేదు"

---- ఈ మధ్య ఓ నటుడి పౌరసత్వం గురించి సోషల్ మీడియా లో జరుగుతున్న రచ్చ ప్రభావం

నయా వైకుంఠం

తెలుగు అసోసియేషన్ ఆఫ్ లండన్ వార్షిక సంచిక లో నా కథ  ప్రచురించిన సంపాదకులకు ధన్యవాదాలు.

అల వైకుంఠ పురంబు లో, నగరి లో, అని పోతన గారు చెప్పినట్లే, భక్త వల్లభుడా శ్రీహరి శేష పాన్పు పై పరుండి, ఏదో ఆలోచిస్తూ ఉండగా, త్రిలోక సంచారియైన నారదుడు శ్రీవారి దర్శనార్థం వచ్చాడు.

"కలహ భోజనా, ఏమి విశేషాలు?"

"హరి హరీ! మీరూ ఆమాటే అంటే ఎలా యదునందనా? నేను ఏమి చేసినా లోక కళ్యాణార్ధమే యని తమరెరగని సత్యమా."

"ఇంతకీ విషయం చెప్పమనండి ప్రభూ" అంటున్న అమ్మవారి మాట విని, నారదుడు

"నరలోక విచిత్రాలు వివరిద్దామనొచ్చాను ప్రభూ."

"మరల వియోగం తప్పదు కాబోలు" అనుకున్నది అమ్మ వారు, పద్మావతీ వృత్తాంతం తలచుకొని.

"అక్కడచూసిన వైకుంఠ వైభోగం తమరు చూసి తీరవలసింద"న్నాడు నారదుడు.

"మర్త్యలోకమున మరొక వైకుంఠ మా!" ఆశ్చర్యం ప్రకటించాడు అరచేయి చూసుకుంటూ కపట నాటక సూత్ర ధారి.

"అలనాడు త్రేతాయుగంలో తమరు వానరులకిచ్చిన వర ప్రభావమున, తామరతంపరగా పుట్టుకొచ్చిన రాజకీయ నాయకులు, ఐదేళ్ల కొకసారి చూపే అరచేతి లో వైకుంఠం కాదు ప్రభూ నేను చూసినది" అన్నాడు అయ్యవారిని గమనించి.

"మరి?"

"ఒక వైకుంఠం కాదు ప్రభూ, కోటాను కోట్ల వైకుంఠాలు. మానవుల అరచేత మొలిచిన అద్దం కథ. "

"మొదట వైకుంఠ మన్నావు, ఇప్పుడు అద్దం అంటున్నావు. తికమక పెట్టక వివరం తెలుపుము నారదా!" అదిలించారు శ్రీవారు.

"అక్కడే ఉంది కిటుకు ప్రభూ. అది మామూలు అద్దం కాదు. అది సమస్త లోక విషయ విశేషాలు చూపగలదు. స్వర్గమూ నరకమూ, మంచీ చెడూ, దేవ దానవ రీతులూ దాని యందు గలవు. మనిషి సృష్టించిన పదిహేనవ లోకమూ దాని యందే కలదు."

"పదిహేనవ లోకమా?"

"అవును జనార్దనా, దానిని జాల లోకమందురు. దైత్యులందరునూ అచ్చట తిష్ఠ వేసుకునుండి, మానవులనిక్కట్ల పాల్జేయు చుంటిరి. జయ విజయులచ్చటనూ ద్వారపాలకులు గా వర్ధిల్లు చున్నారు. వారినచ్చట ఫేస్బుక్ ,వాట్సాప్ లందురు. వీరు మానవ జాతికి తెచ్చు అనర్ధములు చెప్పనలవి కాదు.

గరుత్మంతుని కంటే బలమైన పక్షి యొకటి దాపురించినది. అది సత్యాసత్య ప్రమేయములు లేక అనేకానేక వార్త లను ప్రచారము గావించుచూ మనుషులను పట్టి పీడించు చున్నది.దానిని ట్విట్టరందురు. వీరే గాక నాళికా సురుడు 'యూట్యూబ్' అను పేర, చిత్రపటాసురుడు 'ఇన్స్టాగ్రాం' అను పేర దిన దినాభి వృద్ధి చెందుతున్నారు.వీరి తో పాటు అనేకానేక పేర్లతో పెక్కురు రక్కసులచట పేట్రేగిపోవుచుంటిరి.

కొందరు లక్ష లైకుల నోము, కోటి ఫాలోయర్ల వ్రతము యను విచిత్ర పూజా విధానములను కనిపెట్టి, లోకులను ప్రలోభ పెట్టుచూ పబ్బము గడుపుకొనుచున్నారు.

క్రొంగొత్త ప్రాతః పఠనీయ మంత్రములనూ కనిపెట్టుచున్నారు. నేడట్టి  ప్రార్ధనా మంత్రమొకటి నా చెవిన పడ్డది.

కరాగ్రే వసతే వాట్సాప్

కర మధ్యే ఫేస్బుక్

కర మూలే స్థితా ట్విట్టర్

ప్రభాతే జాల దర్శనం.

మనుజులు వీరి ప్రభావమునకు లోనై, దుర్బలురై, మనోవిచారములతో, దుఃఖములతో బాధ పడుచున్నారు. వీరికి విముక్తి లేదా? వారి ఇక్కట్లను తొలగించుటకు మీరే ఏదైనా మార్గము చెప్పండి ప్రభూ.

అది విన్న మాధవుడు, "నారదా! పెరుగుట విరుగుట కొరకే యను లోకోక్తి నీకు తెలియనిది కాదు. జాలాసుర సృష్టి శివాజ్ఞ లేకుండా జరిగినది కాదు, ఆతని వలన పెక్కు ప్రయోజనములుండుటా కల్ల కాదు. మానవులొట్టి అమాయకులు. వారికెయ్యది ఎటుల ఉపయోగించుకోవలెనో తెలియదు.

జాలాసుర భంజనమునకై పరమశివుని అంశతో వైరస్ అను శక్తి ప్రజ్వరిల్లుచూ ఆ దైత్యులను ఇప్పటికే హడలెత్తించు చున్నది. ఇది కాక హ్యాకింగను మరొక శక్తి కూడా శాయ శక్తులా కృషి చేయు చున్నది. అసురుల పాపము పండువేళ, వీరి శ్రమ కొకనాడు విజయము లభించుట తధ్యము. అంత వరకూ మనుజులు, నిర్జాలీకరణ వ్రతము చేయ వచ్చును”

"నిర్జాలీకరణ వ్రతమ నగా యేమి? అది యెట్లు చేయవలెను?"

నారదా, దుర్లభమగు ఈ వ్రతము మనుజులందరూ చేయ తగినది. అన్ని మతముల వారూ, కులముల వారూ, అన్ని జాతుల వారూ, అన్ని వయసుల వారూ చేయవచ్చును.ఆది వారము నాడు గాని, మరే రోజైననూ గానీ, ఈ వ్రతము చేయ వచ్చును. ప్రాతః, సంధ్యాదులలో ,యే వేళనైననూ చేయ వచ్చును. దీని వలన మానవులకు వారు కోల్పోయిన నిజ జీవితము లభ్యమగును. ఎంచుకున్న సమయము నందు, వీరు నిశ్చింతగా జాల ప్రసారము చేయు చర వాణులనూ, ఇతర పరికరములనూ ఆపి వేయ వలయును. అట్టి సమయమును వారు పిల్లలతో, కుటుంబ సభ్యులతో, స్నేహితులతో గడప వలయును. ఇది వారమునకెన్ని మార్లయిననూ చేయవచ్చును. ఇది సమస్త లోకములకూ ఆనంద దాయకము. 

*********శుభం ***********

కత్తితో పొడుస్తా

సుబ్బారావు మంచి వాడూ, మర్యాదస్తుడూను ఇది అతని మీద అతనికే ఉన్న అభిప్రాయం. సుబ్బారావు వఠ్ఠి మొద్దు మనిషి, బొత్తిగా కళాపోషణ తెలియని వాడు. ఇది అతని మీద అతని భార్య సుందరి కున్న అభిప్రాయం. సుబ్బారావు మరీ అంత కళాపోషణ తెలియని వాడు కాదు. విధి, పవిత్రబంధం లాంటి సీరియల్స్ నుంచి సుకుమార్ సినిమాల వరకు చూసిన మొదటిసారే చక్కగా అర్ధం చేసుకోగల సమర్ధుడు. అలాంటి వాడు ఈ చెడ్డపేరు తెచ్చుకోవడానికి కారణం, తెలుగు సినిమాలల్లో ఉండే కథ కన్నా బలమైనది. సుందరి ఎప్పుడు, ఏ వైపునుంచి వచ్చి కవితల తో కొడుతుందో, కథలతో చంపుతుందో నని భయం వల్ల వచ్చిన బాధతో కూడిన విరక్తి వల్ల కలిగిన చెడ్డపేరు అది.
హాల్లో దిగులుగా కూర్చున్న సుబ్బారావు ని పిలుస్తూ సుందరి వస్తోంది. చేతిలో పెద్ద కాగితాల కట్ట. సమయం లేదు మిత్రమా పారిపో అని అంతరాత్మ హెచ్చరిస్తోంది. చెయ్యగలిగిందేమీ లేక, హిహిహి అని నవ్వుతూ, కొత్తగా ఏమి రాశావు డాళింగ్? అంటూ పలకరించాడు.  ముందు ఈ కవిత విను సుబ్బూ అంటూ, "చంటబ్బాయి" లో వాగ్దేవి లా పాడడం మొదలెట్టింది.

"సుబ్బూ ఏమి వం

డమంటావు? వం

కాయ కూరా? వం

గీ బాతా? వం

కాయ వేపుడా? వెం

టనే చెప్పు? వం

టకి లేటవుతుం.."

'శారదా' అని శంకరాభరణం శంకరశాస్త్రి లా గంభీరంగా అరిచి, సుందరి వాగ్ధాటిని తాత్కాలికం గా ఆపగలిగాడు కాని, లోలోపల వాగ్దేవి ధాటికి బిక్క చచ్చిన బక్క ఎడిటర్ వణికినట్లు వణికి పోతున్నాడు.
"ఏంటి, ఏమైంది ఇంత అంతర్ధానం గా ఆపేవు? ఎనీ ప్రోబ్లం?"
"అంతర్ధానం కాదు డాళింగ్  అర్ధాంతరం అనాలి", టాపిక్ డైవర్టు చేసే ప్రయత్నం లో పడ్డాడు.
"హబ్బ నీకున్న పాండిత్యం లో సగం నాకుంటేనా, ఈ పాటికి నంది ఎవార్డు కొట్టేద్దును."
ఇప్పుడు నందుల గురించి చెప్పే ఓపిక లేక, హిహిహిహి అని నవ్వాడు. లాభం లేదు, ఏదో ఒకటి చేసి ఈ ఉపద్రవాన్ని ఆపాలి.
"ఇంతకీ నాకవిత ఎవరైనా వేస్తారంటావా?" తనే అంది.
"నీ కవిత వేసేంత దమ్మూ, ధైర్యం ఉన్నవాళ్ళు ఆడామగా కలిపి నువ్వొక్కదానివే." గర్వంగా చెప్పాడు.
"నేనా ? ఎలా?"
"ఎలా అంటే, ఫేస్ బుక్ లో వేద్దాం. "
"చూస్తారంటావా? చూసినా లైకు చేస్తారంటావా?"
"పిచ్చి సుందూ, ముప్పై పేజీల పోస్టునైనా, మూడు క్షణాల్లో, చదివినా, చదవక పోయినా పిచ్చ లైకులు, కామెంటులు కొట్టే జాతి మనది"
సుబ్బారావు ఛాతి రెండు ఇంచులు పెరగడం గమనించక పోలేదు సుందరి. అతని ఛాతి అంతే, శాతకర్ణి సినిమా పేరు విన్నా, తెలుగు వాడి ఆత్మగౌరవం అనే మాట విన్నా అలా రెండేసి ఇంచుల చొప్పున పెరిగిపోతూంటుంది.
"సంపూర్ణేష్ నీ, సన్నీలియోన్నీ అక్కున చేర్చుకున్న ఖ్యాతి మనది" చెప్పుకుపోతున్నాడు.
అతని ఫ్లో ఆపక పోతే పెరుగుతూ పోతున్న అతని ఛాతి ని కూడా అమరావతి భూముల్లో కలిపేస్తారేమోనన్న భయంతో.
"నవల కూడా ఫేస్ బుక్ లోనే వేద్దమంటావా?" అంది.
"నవలా?" అదిరిపడ్డాడు.
చేతిలోని మిగతా కాగితాల కట్టని చూపిస్తూ,
"మూఢ నమ్మకాలని రూపుమాపటానికి, ఓ నవల మొదలు పెట్టాను, వంద పేజీలైంది కాని క్లైమాక్సు కుదరటంలేదు. వారం, వజ్రం చూసి మొదలు పెట్టాల్సింది..."
"వజ్రం కాదు బంగారం వర్జ్యం..."
అదేలే, ఇది కూడా ఫేస్ బుక్ లో వేద్దామంటావా?
"తప్పకుండా. రోజుకో పది లైన్ల చొప్పున వేస్తే, అభిషేకం సీరియల్ కన్నా ఎక్కువ ఎపిసోడ్ లవుతాయి. అప్పుడు ఎంచక్కా నువ్వు కూడా సుబ్బిరామిరెడ్డి తో సన్మానం చేయించుకోవచ్చు."
"మరి నంది ఏవార్డో ?"
"నంది ఎవార్డేం ఖర్మ, పరపతి ఉంటే ఒక్క ఫేస్ బుక్ పోస్టుచాలు ఎకాడెమీ ఎవార్డు కొట్టటానికి." రెచ్చగొట్టి వదిలాడు.
మరైతే ఆఫీసు కెళ్ళేటపుడు చదివి క్లైమాక్సు మీద ఏమైనా సజెషన్స్ ఇస్తావా?
నేనే చదవాలా? నీది మరీ ఛాదస్తం కాకపోతేనూ, క్లైమాక్సు పాఠకులే నిర్ణయించేలా ఒక పోటీ పెడదాం.
ఇది చాలా కొత్తగా ఉంది. నీతో మాట్లాడడమే ఒక ఎడ్యుకేషన్ సుమీ!! అంటూ కంప్యూటర్ లో ఫేస్ బుక్  ఓపెన్ చేసింది.
"నేను కవిని కాదన్న వాణ్ణి కత్తితో పొడుస్తా" అని ఆ వాగ్దేవి చేసిన హెచ్చరిక ఇప్పుడు ఈ వాగ్దేవి నిజం చేసేలా వుంది.
ఫేస్ బుక్ జీవులూ తస్మాత్ జాగ్రత్త !!

బంధోత్సవం

పిట్టలన్నీ ఆఖరిసారి రెట్టవేసి గూళ్ళకి చేరేవేళ, సుబ్బారావు ముఖం వేలాడేసుకుని ఇంటికి చేరేసరికి, సుందరి హాల్లో తెల్ల కాగితాల మీద చెట్ల బొమ్మలేస్తోంది. 

బుజ్జిగాడు తన రూంలో ఏదో పని చేసుకుంటున్నట్లున్నాడు.

'ఏవిటోయ్ పెయింటింగా?' అన్నాడు చిలిపిగా.

అదేం కాదు అంది ముసిముసిగా నవ్వుతూ.

సుబ్బూ కంగారు పడి, 'ఏం చేస్తున్నావురా బుజ్జీ' అనుకుంటూ, బుజ్జిగాడి గదిలో కి దూరిపోయాడు.వారం రోజుల క్రితం ఇలాగే ముసిముసిగా నవ్వుతూ, 'నేనో గొప్ప విషయం కనిపెట్టాను తెలుసా' అంది. ఏమిటో అనడిగితే, అబ్బా ఆశ! చెప్పుకో చూద్దాం అంది. 

ఆ విషయం చెప్పుకోలేక పోయినందుకు, చెప్పలేనన్ని బాధలు భరించాడు. అందుకే ఈ కంగారు.

ఏం జరిగిందన్నట్లు చూశాడు బుజ్జి గాడి వైపు.

'ఏదో ట్రావెల్ ప్రోగ్రామనుకుంటా నాన్నా, చదువుకుంటుంటే నన్ను పిలిచి, హరిద్వార్, కాశీ చూపిస్తున్నారు రా చూడు అంది. ఇప్పుడే ఆ ప్రోగ్రాం అయ్యింది, నువ్వొచ్చావు.' అన్నాడు బుజ్జి అమాయకంగా.

అంటే ఇప్పుడు అర్జంటు గా ఏదైనా తీర్ధయాత్ర చేద్దామంటుందన్నమాట అనుకున్నాడు స్వగతంలో.

'బంగారం, ఈ నెల లో సెలవు దొరకటం కష్టం, వచ్చే నెలలో వెళ్దామా హరిద్వార్ కి?' అన్నాడు సుందరి నుద్దేశించి, ధీమా గా, ప్రేమగా.

'ఇప్పుడక్కడికెందుకుట?'అన్న ప్రశ్న విని గతుక్కుమన్నాడు.

అయితే ఇదేదో కొంప మునిగే యవ్వారం లా ఉందని ఫిక్సై పోయాడు.

'అవన్నీ తర్వాత, ఇవాళ నేనో కొత్త థ్రిల్లింగ్ విషయం కనిపెట్టాను తెలుసా?' అంది.

'చెట్టు బొమ్మ ఎలా గియ్యాలనా?'

'నీకెప్పుడూ వేళాకోళమే, ఇది చాలా సీరియస్సు సంగతి' అంది.

చాలా భయమేసింది సుబ్బూ కి. 

ఈ మధ్య ఇలానే సీరియస్సు సంగతి అని, 'ప్రకృతి కి ప్రణామం' అనే సినిమా చూసి, ఇల్లంతా మొక్కలూ, చెట్లూ, పొదలూ, పాదులూ వేయించేసింది. అప్పటినుంచీ ఎప్పుడు పుల్లూ, భల్లూకాలూ వస్తాయోనని తెగ భయం గా బతుకుతున్నాడు.

ఇప్పుడు మళ్ళీ సీరియస్సు సంగతి అంటోంది.

'నువ్వు నాకు తాతవి అవుతావు, నేను నీకు పిన్ని అవుతాను. మరి బుజ్జి గాడేమో వాడి కి వాడే మావయ్య అవుతాడు తెలుసా'

ఎడిసన్  కూడా అంత సంబరపడి ఉండడు, బల్బు కనిపెట్టినప్పుడు. అంత సంబరంగా చెప్తోంది .

ఉలిక్కి పడ్డాడు సుబ్బూ. ఇప్పటి వరకూ ఇచ్చిన షాకులు వేరు, ఇది వేరు.

'పొద్దున్న నేనాఫీసుకి వెళ్ళేటప్పుడు భార్యాభర్తలమేగా, సడెన్ గా ఇలా ఎలా అవుతాం? పైగా మనం పెళ్ళి కి ముందు చుట్టాలం కూడా కాదు.' లాజిక్ లాగుదామని చూశాడు.

సినిమాలే కాదు, సుందరి కూడా లాజిక్ కి అందదన్న విషయం అతనికి తెలియంది కాదు. అయినా ఏదో ఆశ, సగటు ప్రేక్షకుడి లాగా.

'నాకు తెలుసు నువ్వీ రియాక్షను ఇస్తావని. నేను ప్రూవ్  చేయగలను.' అంది ధీమాగా.

తగిన రీసెర్చి చేసిందని చెప్పకనే చెబుతున్నాయి ఆమె చేతిలోని కాగితాలు.

'ఎలా కనిపెట్టానంటావ్?' అంది తనే.

'నువ్వే చెప్పు'లౌక్యం ప్రదర్శించాడు.

'ఏముందీ, నా వైపు ఏడుతరాలూ నీ వైపు ఏడు తరాలూ పరిశీలించి ఇదిగో ఈ వంశవృక్షాలు గీశా. అంతే అన్ని బంధుత్వాలూ తెలిసిపోయాయ్.' అంది ఉత్సాహంగా.

అంటే అవి చెట్లు కాదన్నమాట.

'అవునూ, ఈ వివరాలన్నీ నీకెలా తెలిసాయి? అసలిప్పుడీ మహాయజ్ఞం తలపెట్టాలని నీకెందుకనిపించింది?' ఇండియా వాంట్స్ టు నో అని అరిచే గోస్వామి స్టైల్లో అరవాలనుకుని, మామూలుగానే అడిగాడు.

'ఓ అదా,ఇందాక యప్ టీవీ లో బంధోత్సవం సినిమా చూసి ఇవన్నీ కనిపెట్టేశా' 

'మరి వీటితో ఇంకేం చేద్దామనుకుంటున్నావ్' తరువాత రాబోయే ఉపద్రవాల్ని తలచుకుని వణికిపోతూ అడిగాడు. 

'సుబ్బూ మనం కూడా ఆసినిమాలో లా కాశీ, హరిద్వార్ వెళ్దాం, నువ్వు మీనాన్న కేమౌతావో తెలియట్లేదు. అక్కడేమైనా వివరాలు దొరుకుతాయేమో!!'

సుబ్బు ఫెయింటైపోయాడు.

జై బంధోత్సవం!!!