అనగనగా ఓ కుర్రాడు

4, జులై 2012, బుధవారం

మన ప్రజల కష్టాలన్నిటికీ రాముడే కారణం. ఋజువు ఇదిగో..

రావణ సంహారం తర్వాత , రాజ్యాధికారం వచ్చాక, రాముడి తో అడవి నుంచి వచ్చిన వానర సేన కి రాముడు ఏదైనా కోరుకొమ్మని వరం ఇచ్చాడట. రాముని వైభవం చూసి ఆ వానర సేన 'రామా! మాకునూ మీవలే రాజ్యాధికారం చెలాయించాలని వున్నదీ' అని కోరుకున్నవి. కలియుగం లో మీ కోరిక నెరవేరుతుందని రాముడు వరం ఇచ్చాడట.

ఆ కట్టు కథ కట్ చేస్తే...
ఆనాడు రామునికి సాయం చేసిన ఆ కోతిమూక, పదవుల కోసం యధాశక్తి పార్టీలు దూకుతూ ఇప్పుడు ప్రజలకి ద్రోహం చేస్తోంది.

మిగతా దూకుళ్ళని తక్కువ చెయ్యటం కాదు కానీ.. మన రాష్ట్రం లో నాకు బాగా నచ్చిన 3 దూకుళ్ళు:

1) సినిమాలో బంగీ జంప్ చేసిన మెగాస్టార్ రాజకీయాల్లోనూ చెయ్యగలనని నిరూపించాడు తన ఎమ్మెల్యే ల తో సహా కాంగ్రెస్ లోకి దూకి. ప్రజలు కోరుకున్నారట ఈయన దూకాడట.

2) ఎం వి మైసూరా రెడ్డి: కాంగ్రెస్ లో వుండగా బిగ్ బాస్ వివాదం తో చంద్రబాబు ని ఇరుకున పెట్టి, అదే చంద్రబాబు పార్టీ లోకి జంప్ చేసి తాజాగా లక్ష కోట్ల లెక్కలు చెప్పి జగన్ పై రాళ్ళు రువ్వి వెంటనే అదే జగన్ పార్టీలోకి జంప్ చేసారు. మళ్ళీ రాజ్యసభ ఎన్నికలు ఎప్పుడో?

3) దేవేందర్ గౌడ్: ఎన్.టి.ఆర్ నీడలో పెరిగి, బాబు తో జత కట్టి నంబర్ టూ గా చలామణీ అయ్యి, తెలంగాణా ప్రజలు కోరుకున్నారని చారిత్రాత్మకం గా ఒక పార్టీ పెట్టి, మళ్ళీ ప్రజలు కోరుకున్నారని చారిత్రాత్మకం గా ప్రజారాజ్యం లో విలీనం చేసి, భంగ పడి మళ్ళీ ప్రజల కోరిక మేరకు , రాష్ట్ర చారిత్రాత్మక అవసరాల కోసం బాబు పంచన చేరాడు. పదవి కోసం ఎన్ని చారిత్రాత్మక దూకుళ్ళ కైనా సిద్ధం.

అసలు ఈ దూకుళ్ళ కి అంతే లేదు. ఈ దూకుడు రాయుళ్ళకి (రాణులకి కూడ) గురు తుల్యులు ఎవరైనా వున్నారు అంటే అది దేవిలాల్, చంద్రశేఖర్ లాంటి జాతీయ నాయకులే అని చెప్పాలి. దేవిలాల్ స్టైలే వేరు. యాభై ఏళ్ళలో ఈయన దూకిన పార్టీ లు 11. ఈయనే రాజకీయ మెగాస్టార్ .

కాంగ్రెస్

ఫ్రోగ్రెస్సివ్ ఇండిపెండెన్స్ ఫార్టీ

కాంగ్రెస్

హర్యానా కాంగ్రెస్

కాంగ్రెస్

కిసాన్ సంఘర్ష్ సమితి

భారతీయ లోక్ దళ్,

జనతా పార్టీ

హర్యానా సంఘర్ష్ సమితి

దళిత్ మజ్దూర్ కిసాన్ పార్టీ

జనతా దళ్

ఉన్నత పదవులు పొందటానికి దూకడం రాజకీయాల లోనే కాదు, ఉద్యోగాలలోనూ వుంది. అసలు గిరీశం తప్పు చెప్పాడు, పొగ తాగని వాడు కాదు, తెగ దూకని వాడు దున్నపోతై పుట్టున్ అనిఉండాల్సింది..

'అంతా నువ్వే చేసావు' అని రాముడి ఫోటో వైపు చూస్తూ అనాలని ఎవరికైనా అనిపిస్తే అది మీ తప్పు కాదు..

29, జూన్ 2012, శుక్రవారం

ఈ మధ్య యూట్యూబ్ లో సంచలనం రేపిన బ్రహ్మి సినిమా జఫ్ఫా ట్రైలర్ చూసాకా, చాలా సినిమాలలో బ్రహ్మి వాడిన ఈ పదం అంటే ఏమిటో తెలుసుకోవాలని నా లాంటి పామరులే కాదు, ఎందరో మేధావులు కూడా ప్రయత్నిస్తున్నారు.
ఉదాహరణకి ఈ టివి స్టార్ మహిళ లో పార్టిసిపెంట్స్ ని ఆడిగింది సుమ, ఎవ్వరూ సరైన సమధానం చెప్పలేక పోయారు.
ఇంతకీ ఇది ఒక నామవాచకమా? సర్వనామామా? అసలు తెలుగు పదమేనా? ఇలాంటి ఎన్నో తుంటరి ప్రశ్నలు నన్ను చుట్టు ముట్టాయి. అప్పుడే గూగుల్ జఫ్ఫా ని అడిగా.. ఆ సమాధానాల సమాహారమే జఫ్ఫానందం...
ప్రపంచం లో పలు రకాల జఫ్ఫాలు ఉన్నట్లు తెలుస్తుంది. వీటిలో మొదటి జఫ్ఫా ఇజ్రాయెల్ లో ఉన్న ఒక పురాతన పట్టణం. వివరాలకి ఇక్కడ నొక్కండి.

రెండో జఫ్ఫా .. కేకులు.

మూడో జఫ్ఫా ..ఒక పండు

నాలుగో జఫ్ఫా ..ఒక సినిమా

ఇదీ ఒక జఫ్ఫా నే..

ఇంకా పలు రకాల జఫ్ఫాలు ఉన్నాయని గూగుల్ జఫ్ఫా ఉవాచ.. ఎన్ని జఫ్ఫాలున్నా ఈ జఫ్ఫా కి సాటిరావు....

గమనిక: ఈ టపా లో వాడిన బొమ్మలు అన్నీ గూగుల్ జఫ్ఫా సౌజన్యం తో..

18, జూన్ 2012, సోమవారం

లెజెబ్రిటీ

"నేను టివి లో రాబోతున్నానోచ్" అని వసంత ఫేసుబుక్ లో పెట్టిన స్టేటస్ మెసేజి కి డెబ్భై లైకులూ, ముప్ఫై కామెంట్లూ వచ్చాయి. వసంత "దంచి కొట్టు దుమ్ము లేపు" రియాలిటీ షో లో టివి లో కనబడబోతోంది. ఆ పోటీ లో పాల్గొనేవాళ్ళూ, జడ్జీలూ జుట్టూ జుట్టూ పట్టుకొని కొట్టుకోవడాలూ, బండబూతులు తిట్టుకోవడాలూ, పరస్పరం చేసుకునే ఛాలెంజీ లు వెరసి ఆ షో మొదలైన వెయ్యి వారాల్లోనే నంబర్ వన్ షో అయ్యింది. అసలు ఆ ప్రోగ్రాము యాంకర్ చీత్కార్ అన్నయ్య యాంకరింగే పెద్ద హైలైటు. ప్రసారం అయ్యే రోజు తెలియగానే మళ్ళీ ఫేసుబుక్ లో అప్ డేట్ చేసింది. మళ్ళీ చాలా కామెంట్లూ , లైకులూనూ.అందరూ తెగ ఎదురుచూస్తున్నారు ప్రోగ్రాము కోసం. వసంత ఆ టైముకి కరెంటు కోత ఉండకుండా చూడమని కోటి దేవుళ్ళకి మొక్కింది.
ప్రోగ్రాము చూసిన వాళ్ళందరూ తెగ మెచ్చేసుకున్నారు వసంతని. ఆడియన్సు లో కూర్చున్న వసంత సర్కస్ ఫీట్ల లాంటి డాన్సులు చూసి ఇచ్చిన హావభావాలు అందరినీ కట్టిపడేశాయి. మొత్తం మూడు సెకండ్లు వున్న తన వీడియో ని యూట్యూబ్ లో పెట్టింది. అర గంట లో ఇరవై మంది చూసిన ఆ వీడియో ఒక పెద్ద సంచలనం రేపుతుందని చీత్కార్ అన్నయ్య కూడా ఊహించలేదు.ఇలాంటి వార్తలే ప్రసారం చేసే టివి 29 వాళ్ళు, ఆ వీడియో ని రోజంతా చూపించడం తో పాటు వసంత సెలెబ్రిటీ నో లెజెండో తేల్చుకోలేక లెజెబ్రిటీ అని తీర్మానించేసారు.
"రేపు టివి 29 లో నా ఇంటర్వ్యూ యోచ్" అని వసంత పెట్టిన స్టేటస్ మెసేజి కి మళ్ళీ విపరీతమైన లైకులూ, కామెంట్లూనూ.